Pichanda yette yashliq balining ölümi heqqide “Bu milliy toqunush weqesi emes” teshwiqati élip bérilmaqta

Pichanda 7 yashliq Uyghur balining 52 yashliq xitay köchmen teripidin öltürülüsh weqesi yüz bergendin kéyin, xitay da'iriliri weqe yüz bergen etraptiki meschit we kent ahaliler komitétida “Bu weqe milliy toqunush weqesi emes” teshwiqatini élip barmaqta.

Da'iriler bu teshwiqatini resmiy axbarat wastiliride emes, weqe yüz bergen yéza etrapidiki meschitlerde élip barmaqta. Xitay bu teshwiqatida qatilning eslide nérwa késel ikenlikini, özi ishlewtqan xumdan sahibi bilen ziddiyiti barliqini, xumdan sahibini öltürmekchi bolup turghanda, 7 yashliq enqerjan uchrap qélip uni öltürüwetkenlikini ilgiri sürüshken. Qatil heqqidiki bu yétersiz we mentiqisiz chüshendürüshke yurt jama'iti nöwette süküt bilen jawab qayturmaqta. Töwende muxbirimiz shöhret hoshurning bu heqte teyyarlighan programmisini anglaysiler:

Ashkarilinishiche, qatil xitayning shenshi ölkisidin bolup, pichanda yashawatqinigha az dégende 10 yildin ashqan. Da'irilerning ammigha chüshendürüshiche, qatil eslide xumdanda ishchilarni bashquridighan bir guruppa bashliqi bolup, yéqinda xumdan sahibi uning ornigha chungchingdin kelgen birsini guruppa bashliqi qilip teyinligen. Buninggha qorsiqi köpken qatil, xumdan sahibini öltürüwétish üchün, xumdan'gha barghanda, 7 yashliq enwerjan uchrap qélip uni öltürüwetken. Xitay da'iriliri zor bir wehshiy weqeni mana mushunchilikla bir izahat bilen xulasilimaqta we bu xulasige yurt jama'itini ishendürüshke urunmaqta. Jama'et bolsa bu chüshendürüshlerge süküt bilen jawab qayturmaqta we sotning hökümini kütüshmekte.

Hörmetlik radi'o anglighuchilar, ötkenki melumatlardin qarighanda, pichan nahiyilik partkom sékritari ölgüchining a'ile - tawabi'atigha qatilni téz we qattiq jazalaydighanliqi heqqide wede bergen. Eger qatil rastinla nérwa késel bolsa, sot uni éghir halda jazalimaydighanliqi éniq. Undaqta xitay partkom sékritari ölgüchi a'ile - tawabi'atigha néme dep chüshenche béridu? mana buningdin qarighanda, pichandiki weqening “Wetenperwer” diniy zat éytqandek, undaq asanla tinjimaydighanliqi hazirdin bashlap melum bolmaqta.