Куча алақағилиқ мал дохтури мәмәт ибраһимниң қамақханида өлгәнлики мәлум болмақта

Мухбиримиз шөһрәт һошур
2016-05-19
Share
Uyghur-Siyasi-mehbus-hayati-305.jpg Уйғур сиясий мәһбус көләңгиси.
File

Шиветсийәдики шәрқи түркистан тәшвиқат мәркизиниң торида өткән һәптә, куча алақағилиқ мал дохтур мәмәт ибраһимниң 2014 ‏-йили йил ахирида түрмидә өлгәнлики вә униң өлүмигә қейин-қистақ сәвәб болғанлиқи хәвәр қилинди. Мухбиримиз бу һәқтә алақағиға телефон қилғинида сақчихана хадимлири мәмәт ибраһимниң делоси һәққидә мәлумат беришни рәт қилған болсиму, әмма униң өлгәнлики һәққидики хәвәрни рәт қилмиди. Сақчилардин бири өзиниң бу һәқтә гәп қилишқа амалсизлиқини ашкарилиди.

Шәрқи түркистан тәшвиқат мәркизиниң бу һәқтики хәвиридә баян қилинишичә, мәмәт ибраһим тутқун қилинған йили 40 яш әтрапида болуп, у алақаға базириниң қанас 4 ‏-кәнтиниң мал дохтури, у қол телефонида тәблиғ аңлиғанлиқи вә тәблиғни сақлиғанлиқи үчүн 2014 ‏-йили 7 ‏-айда тутқун қилинған. Йәни мәмәт ибраһимниң тутқун қилинған вақти уйғур районида "бир йил қаттиқ зәрбә бериш" намидики һәрикәт долқуни башлиништин 2 ай кейингә тоғра келиду.

Мәзкур хәвәрдә дейилишичә, мәмәт ибраһим алақаға базарлиқ сақчихана тәрипидин тутқун қилинған вә аталмиш җинайитигә қейин-қистақ арқилиқ иқрар қилдурулған. У иқраридин кейин куча наһийилик қамақханида йөткәлгән вә 3 айдин кейин аилисигә униң өлүм хәвири йәткүзүлгән, әмма җәсити берилмигән.

Даириләр мәмәт ибраһимниң өлүм хәвирини аилисигә йәткүзгәндә униң йүрәк кесили билән өлгәнликини ейтқан, әмма мәзкур аилини мәрһум һәққидә нәзир өткүзүштин чәклигән, һәтта бу аилә назарәт астиға елинип, мәһәллә җамаитиниң бу мусибәтлик аилини зиярәт қилишини чәклигән. Биз бу учурниң тоғрилиқини ениқлаш үчүн алақаға йезилиқ сақчиханиға телефон қилдуқ.

Сақчихана хадимлири гәрчә мәмәт ибраһимға алақидар учур билән тәминләшни рәт қилған болсиму, униң түрмидә өлгәнлики учурини рәт қилмиди. Буниңдин қариғанда мәмәт ибраһимниң қамақханида қейин-қистақтин өлгәнлики вә кучадики даириләрниң бу әһвални йошуруш үчүн җәсәтни аилисигә бәрмигәнлики вә йезилиқ сақчихана хадимлириниму бу һәқтики учурни мәхпий тутуш һәққидә агаһландурғанлиқи мәлум болмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт