Kucha alaqaghiliq mal doxturi memet ibrahimning qamaqxanida ölgenliki melum bolmaqta
2016.05.19

Shiwétsiyediki sherqi türkistan teshwiqat merkizining torida ötken hepte, kucha alaqaghiliq mal doxtur memet ibrahimning 2014 -yili yil axirida türmide ölgenliki we uning ölümige qéyin-qistaq seweb bolghanliqi xewer qilindi. Muxbirimiz bu heqte alaqaghigha téléfon qilghinida saqchixana xadimliri memet ibrahimning délosi heqqide melumat bérishni ret qilghan bolsimu, emma uning ölgenliki heqqidiki xewerni ret qilmidi. Saqchilardin biri özining bu heqte gep qilishqa amalsizliqini ashkarilidi.
Sherqi türkistan teshwiqat merkizining bu heqtiki xewiride bayan qilinishiche, memet ibrahim tutqun qilin'ghan yili 40 yash etrapida bolup, u alaqagha bazirining qanas 4 -kentining mal doxturi, u qol téléfonida tebligh anglighanliqi we teblighni saqlighanliqi üchün 2014 -yili 7 -ayda tutqun qilin'ghan. Yeni memet ibrahimning tutqun qilin'ghan waqti Uyghur rayonida “Bir yil qattiq zerbe bérish” namidiki heriket dolquni bashlinishtin 2 ay kéyin'ge toghra kélidu.
Mezkur xewerde déyilishiche, memet ibrahim alaqagha bazarliq saqchixana teripidin tutqun qilin'ghan we atalmish jinayitige qéyin-qistaq arqiliq iqrar qildurulghan. U iqraridin kéyin kucha nahiyilik qamaqxanida yötkelgen we 3 aydin kéyin a'ilisige uning ölüm xewiri yetküzülgen, emma jesiti bérilmigen.
Da'iriler memet ibrahimning ölüm xewirini a'ilisige yetküzgende uning yürek késili bilen ölgenlikini éytqan, emma mezkur a'ilini merhum heqqide nezir ötküzüshtin chekligen, hetta bu a'ile nazaret astigha élinip, mehelle jama'itining bu musibetlik a'ilini ziyaret qilishini chekligen. Biz bu uchurning toghriliqini éniqlash üchün alaqagha yéziliq saqchixanigha téléfon qilduq.
Saqchixana xadimliri gerche memet ibrahimgha alaqidar uchur bilen teminleshni ret qilghan bolsimu, uning türmide ölgenliki uchurini ret qilmidi. Buningdin qarighanda memet ibrahimning qamaqxanida qéyin-qistaqtin ölgenliki we kuchadiki da'irilerning bu ehwalni yoshurush üchün jesetni a'ilisige bermigenliki we yéziliq saqchixana xadimlirinimu bu heqtiki uchurni mexpiy tutush heqqide agahlandurghanliqi melum bolmaqta.