Ili téléwiziye istansisining tehriri, rézhissor erkin tursunning az dégende 7 yilliq késilgenliki ashkarilandi

Muxbirimiz shöhret hoshur
2018-10-18
Élxet
Pikir
Share
Print
Ili téléwiziye istansining tehriri, rézhissor erkin tursun ependi sin'gha almaqta.
Ili téléwiziye istansining tehriri, rézhissor erkin tursun ependi sin'gha almaqta.
Oqurmenler Teminligen

Ili oblastliq téléwiziye istansisining tehriri, Uyghur rayonida keng tonulghan ijtima'iy we medeniyet pa'aliyetchisi erkin tursunning bu yil 3-ayda tutqun qilin'ghanliqi we qisqa waqit ichide késiwétilgenliki ashkarilandi.

Bu yil del 50 yashqa kirgen, teshkilatchiliq pa'aliyiti shinjang uniwérsitétida bashlan'ghan, jem'iyetke chiqqandin kéyinmu héch tinim tapmighan, janliq téléwiziye programmiliri, ishligen kinoliri we teshkilligen meshrep hem musabiqe pa'aliyetliri bilen her waqit közge körünüp kelgen, teshkilatchi we rézhissor erkin tursunning bölgünchilik bilen eyiblinip az dégende 7 yilliq késilgenliki melum boldi. Erkin tursunning bir pa'aliyiti dawamida ghulja nahiyesidiki jélilyüzi saqchixana xadimliri teripidin tutqun qilin'ghanliqi delillendi.

Weziyettin xewerdar kishilerdin biri ötken ayda radiyomizgha uchur yollap, ghuljidiki tonulghan ijtima'iy we medeniyet pa'aliyetchisi erkin tursunning bu yil 3-ayda tutqun qilin'ghanliqi we aridin uzun ötmey késiwétilgenlikini melum qildi. Bir aygha yéqin dawam qilghan éniqlishimizning deslepki basquchida, biz erkin tursunning xizmet orni bolghan ili oblastliq téléwiziye istansisigha téléfon qilduq. Téléfonimizni qobul qilghan xadim erkin tursunning nöwette xizmet ornida yoqluqini delillidi. Biz uningdin erkin tursunning nöwettiki ehwalini, yeni uning lagérda yaki türmide ikenlikini sorighinimizda, bu xadim bu heqte melumat bérelmeydighanliqini, bu heqte mezkur idare mes'ullirining jawab béreleydighanliqini bayan qildi.

Weziyettin xewerdar kishi erkin tursunning ghulja shehiridiki döngmehelle saqchixanisi teripidin tutqun qilin'ghanliqini bayan qilghan idi. Döngmehelle saqchixana xadimi, erkin tursun heqqide söz échishtin jiddiy bir endishe ichide özini qachurdi. Emma radiyomizgha kelgen yene inkasta, erkin tursunning ghulja nahiyeside bir medeniyet pa'aliyitige yétekchilik qiliwatqan mezgilde, mezkur nahiyediki melum bir saqchixana teripidin tutqun qilin'ghanliqi bayan qilin'ghan. Shunga biz ghulja nahiyesidiki xudiyaryüzi saqchixanisigha téléfon qilduq. Bu saqchixanidiki xadimlar, deslepte bu heqte éniq gep qilishtin özini qachurghan bolsimu, emma sözliride erkin tursunning tutulghanliqini ret qilmidi.

Erkin tursunning xizmettiki netijiliri heqqide xitay axbarat wasitiliride ilgiri bésilghan, bu yil tutqun qilin'ghandin kéyin öchürüwétilgen bir parche maqalida tonushturulushiche, shinjang uniwérsitétining tarix fakultétini püttürgen erkin tursun ghulja turpanyüzide bir mehel oqutquchiliq qilghandin kéyin, 1990-yillardin taki tutulghan'gha qeder ili oblastliq téléwiziye istansisining muxbiri we tehriri bolup xizmet qilghan؛ u riyasetchilik qilghan " Ümidlik közler" mawzuluq yash-ösmürler programmisi taki 2017-yiligha qeder dawam qilghan. U ishligen 10 din artuq programma xitay memliketlik we Uyghur aptonom rayonluq mukapatlargha érishkendin bashqa, özi bultur 7-ayda ili oblastidiki 12 axbarat xadimining biri bolup bahalan'ghan. U ili téléwiziye istansisidiki xizmetlirining sirtida yene sen'et ömek teshkillesh, boks musabiqisi uyushturush, ösmür balilarni tarixiy jaylarni ziyaretke teshkillesh qatarliq köp xil shekildiki pa'aliyetler bilen shughullan'ghan. Weziyettin xewerdar kishining bayan qilishiche, u ishligen " Dunya, méhir muhebbet bilen güzel" namliq programma, amma ichide küchlük alqishqa érishish bilen birlikte, uningda üch Uyghur ösmürning turmush qiyinchiliqi tilgha élin'ghanliqi üchün, programma qoyulushtin cheklen'gen, özimu xitay saqchilirining nuqtiliq tekshürüsh obyéktigha aylan'ghan.

Biz erkin tursun délosining tepsilatini uqush üchün xudiyaryüzi saqchixanisigha qayta téléfon qilduq. Saqchi xadimi bu nöwet erkin tursunning ghulja nahiyesidiki bazarliq saqchixana teripidin yeni jélilyüzi saqchixana teripidin tutqun qilin'ghanliqini delillidi. Emma bu xadim erkin tursunning tutulush sewebi we artilghan jinayet heqqide melumat bérelmidi. Radiyomizgha kelgen inkasta erkin tursunning ghulja nahiyeside tutulghandin kéyin, uning ghulja sheherlik dölet amanliq saqchilirigha ötküzüp bérilgenliki tilgha élin'ghan idi.

Erkin tursun heqqide radiyomizgha kelgen uchurlarda yene, uning 9 we 11 yilliq késilgenliki heqqidimu uchurlar mewjut.

Weziyettin xewerdar kishining radiyomizgha bildürüshiche, erkin tursun élip barghan pa'aliyetlirining ehmiyetlikliki sewebidin u xelq ichide ghuljidiki nurtay haji, ablimit xalis haji, ghopur haji qatarliq kishiler bilen birlikte " Ghuljidiki 4 serxil", "Ghuljidiki 4 göher" dégendek namlar bilen atilip kelgen.

Toluq bet