Xotende öyini din ögen'güchilerge bergen nurnisagül 6 yilliq qamaqqa höküm qilin'ghan

Xotenning ilchi yézisidiki tijaretchi nurnisagül xanim xoten sheher ichidiki bir öyini din öginiwatqan oqughuchilargha bergenliki üchün 6 yilliq késilgen.

Mushu xil jazalar heqqide bügün pikir bayan qilghan amérikidiki doktor qahar barat ependi, xitayning Uyghurlarni jazalash üchün peqet bahane-seweb izdewatqanliqini, buning bu döletning küchlüklükini emes, eksiche ajizliqini ipadileydighanliqini ilgiri sürdi.

Uyghur rayonida dawam qiliwatqan keng kölemlik tutqun we éghir késim heqqide éniqlashlirimiz dawamida xotenning ilchi yéza 4 ‏- kentidiki nurnisagül isimlik bir ayalningmu 6 yilliq késilgenliki ashkarilandi. Mezkur kent amanliq mudirining bayan qilishiche, tijaretchi nurnisagül xanim 4 balining anisi؛ u xoten sheher ichidiki bir öyini din öginiwatqan oqughuchilargha bergen iken.

Uning bu qilmishi “Qanunsiz diniy pa'aliyetlerni qollash” dep eyiblen'gen. Yene ahalilerning pash qilishiche, nurnisagülning xotendiki öyini din öginiwatqan oqughuchilargha bérishi buningdin 7 yilning awwalqi ish iken.

Amérikada yashawatqan qahar barat ependi, nurnisagülning eslide jazalinidighan emes, mukapatlinishqa munasip kishi ikenlikini eskertti. Xitayning Uyghurlar ichidiki mukapatlashqa tégishlik kishilerni jazalash, jazalinishqa tégishlik kishilerni etiwarlash we östürüsh qatarliq yollar bilen Uyghur rayonidiki hakimiyitini dewrlerdin qoghdap kéliwatqanliqini ilgiri sürdi. Qahar ependi yene yéngisarda oghlini haraqtin tosqan tursun memetning 10 yilliq késilgenliki heqqidiki weqe üstidimu toxtilip, xitay da'irilirining rayonda yillardin béri shekillendürgen ziddiyetni hel qilishning ornigha yene yéngi ziddiyetlerni tughduruwatqanliqini eskertti. Qahar barat ependining qarishiche, xitay da'iriliri bu xil jazalar arqiliq Uyghurlargha qarita heywe we küch körsetmektiken. Emma qahar ependining tekitlishiche, bu qudretlik bir döletning charisi emes. Bu bu türdiki chariler peqet ajizliqning ipadisi, yeni qanunsiz tutqun we jazalar, rayondiki xitay hakimiyitining qanuniy asasining yoqluqining wasitilik halda étirap qilinishi iken.

Yuqiridiki awaz ulinishidin xotende nurnisagül isimlik bir tijaretchi ayalning buningdin 7 yil burun öyini din ögen'güchilerge bergenliki üchün 6 yil késilgenliki heqqide uchur we mulahizilerning tepsilatini anglighaysiler.