Gumandarlarni qoghlap tutushqa qatnashqan bir ahale: qismitimiz shu gumandarlardin perqliq bolmidi

Muxbirimizning qaraqash purchaqchidiki saqchi we ahalilerge qarita élip barghan téléfon ziyaretliri dawamida purchaqchi yézisidin yépiq terbiyilesh merkizige ewetilgen 4000 che kishining köpinchisining ötken yili xitay qoralliq küchliri purchaqchida élip barghan atalmish térrorchilarni iz-qoghlap zerbe bérish opératsiyeside wezipe ötigenler ikenliki ashkarilandi. Shu qétimqi opératsiyede özi we üch oghlining 13 kün kaltek tutup wezipe ötigenlikini melum qilghan bir partiye ezasi, bu yilqi tutqunda, ahalilerning shu qétimliq xizmitining qilchimu étibargha élinmighanliqini bayan qildi.

2014-Yili xotenning purchaqchi yézisida birqanche qétim xitay hakimiyitining zorawanliqigha qarita qarshiliq heriketliri yüzbergen. Xitay qoralliq küchliri weqeni bésiqturushta, yerlik xelqni sepning aldigha ittergen. Xitay merkizi téléwiziyesining 2014-yili 8-ayning 1-küni bergen bir xewiride déyilishiche, mezkur opératsiye dawamida xitay qoralliq küchliri gumandarlarni ayaq quduqla kentide qorshawgha élip, ulardin 9 nepirini neq meydanda étiwetken, bir nepirini esir alghan. Mezkur xewerde déyilishiche, xitay terep bu gumandarlarning orinini bayqashta yerlik amma teminligen 70 nechche uchurdin paydilan'ghan؛ iz qoghlash we qorshash herikitige 30 ming kishilik amma ishtirak qilghan.

Bu qétim ene shu qanliq weqe yüz bergen purchaqchi yézisigha qarita élip barghan téléfon ziyaretlirimiz dawamida, xitayning ene shu iz-qoghlap zerbe bérish herikitide xitay terepte turghuzulup rol aldurulghan, purchaqchidiki ahalilerning, bu yilqi tutqun we qayta terbiyeleshte xuddi özliri izini qoghlighan gumandarlargha oxshashla xitay da'irilirining nazaret we zerbe obyéktigha aylan'ghan.

Purchaqchidiki mezkur qanliq weqe heqqide 2014-yili radi'omiz igiligen uchurlardin melum bolushiche, abduraxman abdukérim bashchiliqidiki bir türküm yashlar, ramizan mezgilide öy tekshürüp kirip zorawanliq qilghan xitay saqchilargha we ularning yerliktiki yantayaqlirigha qarshiliq körsetken we bezilerge ejellik zerbe bergen idi. Bügün ashkarilinishiche ene shu qétimliq qarshiliq herikitide zerbe yégen, emma aman qalghan kent sékrétari hélihem, ayaq purchaqchi kentide sékrétarliq wezipisini ötimekte.

Yuqirida purchaqchi yézisida gumandarlarni qoghlap tutush rol alghan ahalilerning emdilikte, ene shu gumandarlargha oxshashla xitay da'irilirining zerbe nishanigha aylan'ghanliqi heqqide anglitish berduq.