Германийәдики уйғурлар хитайниң ички орган сетиш җинайитигә қарши намайишқа қатнашти

Ихтиярий мухбиримиз әкрәм
2013-07-10
Елхәт
Пикир
Share
Принт
Хитайдики инсан ички органлирини көчүрүп сетишқа қарши паалийәттин көрүнүш. 2013-Йили 5-июл, германийә.
Хитайдики инсан ички органлирини көчүрүп сетишқа қарши паалийәттин көрүнүш. 2013-Йили 5-июл, германийә.
RFA/Ekrem

Германийәниң мюнхен шәһиридә 5-июл күни германийә хәлқара инсан һәқлири тәшкилати тәрипидин хитайдики мәһбусларниң ички әзалирини елип сетишқа қарши көргәзмә вә тәшвиқат паалийити уюштурулди.

Икки саәт давам қилған бу паалийәткә хәлқара инсан һәқлири тәшкилати, хәтәр астидики милләтләрни қоғдаш тәшкилати вә фалүнгуңчилар қатнашқандин сирт, уйғурлардин баш штаби мюнхен шәһиридә болған явропа шәрқий түркистан бирлики тәшкилати вә германийә уйғур аяллар комитетиниң бир қисим рәһбәрлири һәм әзалириму қатнашти.

Мюнхен шәһиридики әң ават саяһәт вә сода мәркизи болған мәрйәм мәйданида өткүзүлгән бу паалийәт көзәткүчиләрниң диққитини җәлп қилди. Нәқ мәйданда ички әза оператсийиси тәқлидий елип берилип, кишиләрниң зор қизиқишини қозғиди.

Бу қетимқи паалийәткә иштирак қилған явропа шәрқий түркистан бирлики тәшкилатиниң рәиси әнвәрҗан әпәнди тәсиратини билдүрүп, хитайдики инсан ички әзалирини елип сетиш қилмишини хәлқара җәмийәткә билдүрүшниң әһмийити тоғрисида тохталди. У сөзидә, шәрқий түркистандики сиясий мәһбусларниң ички әзалириниңму оғрилинип сетиливатқанлиқини тилға алди.

Хитай фалүнгуңчилар тәшкилатиниң германийәдики мәсуллиридин чең фамилилик бир кишиму зияритимизни қобул қилип, хитайниң мәһбусларниң ички әзалирини көчүрүп сетиш қилмишиниң пүтүн хитай тәвәсидә әвҗ алғанлиқини, уйғур вәтининиңму бундақ паҗиәдин мустәсна әмәсликини тәкитлиди. У сөзидә, илгири бир нәпәр уйғур дохтурниң ички әза көчүрүп сетиш паалийитигә қатнишип, чәтәлгә чиққандин кейин өз бешидин өткәнләрни елан қилғанлиқини, бу хатириниң чәтәлдә бәлгилик тәсир қозғиғанлиқини тилға алди. Хитай зиялийси чең йәнә 1999-йилидин башлап фалүнгуңчилар хитай һөкүмитиниң бастурушиға учриғандин буян, уларниң ички әзалириниңму мәхпий сетилиш тәқдиригә йолуққанлиқини әскәртти. У сөзидә, хитай һөкүмити тәрәптин ички әзалири елип сетилған фалүнгуңчиларға аит нурғун дәлил-испатлар барлиқини, 1999-йилдин буян ички әзалири суғурувелинип сетилған фалүнгуңчиларниң саниниң аз дегәндә 100 миңдин ашидиғанлиқини тилға алди. Униң қаришичә, хитайда мәһбусларниң ички әзалирини елип сетиш иши шәхсләр иликидики иш әмәс, бәлки бу җинайәтни хитай һөкүмити мәхсус дохтурханилар вә һәрбий дохтурханиларда өзлири биваситә қол тиқип елип бармақта. Буни пүтүн инсанийәткә қилинған зиянкәшлик дәп қарашқа болиду.

Пикирләр (0)
Share
Толуқ бәт