Gérmaniyediki Uyghurlar xitayning ichki organ sétish jinayitige qarshi namayishqa qatnashti

Ixtiyariy muxbirimiz ekrem
2013-07-10
Élxet
Pikir
Share
Print
Xitaydiki insan ichki organlirini köchürüp sétishqa qarshi pa'aliyettin körünüsh. 2013-Yili 5-iyul, gérmaniye.
Xitaydiki insan ichki organlirini köchürüp sétishqa qarshi pa'aliyettin körünüsh. 2013-Yili 5-iyul, gérmaniye.
RFA/Ekrem

Gérmaniyening myunxén shehiride 5-iyul küni gérmaniye xelq'ara insan heqliri teshkilati teripidin xitaydiki mehbuslarning ichki ezalirini élip sétishqa qarshi körgezme we teshwiqat pa'aliyiti uyushturuldi.

Ikki sa'et dawam qilghan bu pa'aliyetke xelq'ara insan heqliri teshkilati, xeter astidiki milletlerni qoghdash teshkilati we falün'gungchilar qatnashqandin sirt, Uyghurlardin bash shtabi myunxén shehiride bolghan yawropa sherqiy türkistan birliki teshkilati we gérmaniye Uyghur ayallar komitétining bir qisim rehberliri hem ezalirimu qatnashti.

Myunxén shehiridiki eng awat sayahet we soda merkizi bolghan meryem meydanida ötküzülgen bu pa'aliyet közetküchilerning diqqitini jelp qildi. Neq meydanda ichki eza opératsiyisi teqlidiy élip bérilip, kishilerning zor qiziqishini qozghidi.

Bu qétimqi pa'aliyetke ishtirak qilghan yawropa sherqiy türkistan birliki teshkilatining re'isi enwerjan ependi tesiratini bildürüp, xitaydiki insan ichki ezalirini élip sétish qilmishini xelq'ara jem'iyetke bildürüshning ehmiyiti toghrisida toxtaldi. U sözide, sherqiy türkistandiki siyasiy mehbuslarning ichki ezaliriningmu oghrilinip sétiliwatqanliqini tilgha aldi.

Xitay falün'gungchilar teshkilatining gérmaniyediki mes'ulliridin chéng famililik bir kishimu ziyaritimizni qobul qilip, xitayning mehbuslarning ichki ezalirini köchürüp sétish qilmishining pütün xitay teweside ewj alghanliqini, Uyghur wetininingmu bundaq paji'edin mustesna emeslikini tekitlidi. U sözide, ilgiri bir neper Uyghur doxturning ichki eza köchürüp sétish pa'aliyitige qatniship, chet'elge chiqqandin kéyin öz béshidin ötkenlerni élan qilghanliqini, bu xatirining chet'elde belgilik tesir qozghighanliqini tilgha aldi. Xitay ziyaliysi chéng yene 1999-yilidin bashlap falün'gungchilar xitay hökümitining basturushigha uchrighandin buyan, ularning ichki ezaliriningmu mexpiy sétilish teqdirige yoluqqanliqini eskertti. U sözide, xitay hökümiti tereptin ichki ezaliri élip sétilghan falün'gungchilargha a'it nurghun delil-ispatlar barliqini, 1999-yildin buyan ichki ezaliri sughuruwélinip sétilghan falün'gungchilarning sanining az dégende 100 mingdin ashidighanliqini tilgha aldi. Uning qarishiche, xitayda mehbuslarning ichki ezalirini élip sétish ishi shexsler ilikidiki ish emes, belki bu jinayetni xitay hökümiti mexsus doxturxanilar we herbiy doxturxanilarda özliri biwasite qol tiqip élip barmaqta. Buni pütün insaniyetke qilin'ghan ziyankeshlik dep qarashqa bolidu.

Toluq bet