بۇلارنىڭ ئىچىدە خوتەننىڭ قارىقاش ناھىيىلىك يەر بايلىقلىرى ئىدارىسى، ئۆز ئىشچى، خىزمەتچىلىرى ۋە ئۇلارنىڭ ئائىلە تاۋاباتلىرىنى، قويۇق دىنىي تۈس بېرىدىغان كىيىم - كېچەكلەرنى كەيمەسلىككە ئاگاھلاندۇرغان ۋە خىلاپلىق قىلغۇچىلارغا 1000يۈەندىن 3000يۈەنگە قەدەر جەرىمانە قويىدىغانلىقىنى ئۇقتۇرغان. قەشقەر ۋىلايىتىدىكى بىر قىسىم يېزا ۋە كەنتلەردە، ئاتالمىش قانۇنسىز دىنىي پائالىيەتلەرنى پاش قىلغۇچىلارغا 5 يۈەندىن 20 مىڭ يۈەنگە قەدەر مۇكاپات بېرىش تۈزۈمىنى يولغا قويغان. شايار ناھىيلىك ستاتىستىكا ئىدارىسى ئاتىزىم يەنى دىنسىزلاشتۇرۇش تەربىيىسى ھەققىدە سەپەرۋەرلىك يىغىنى ئاچقان. يىغىندا قانۇنسىز دىنىي پائالىيەتنىڭ 26 ئالامىتى شەرھىلەپ ئۆتۈلگەن.
دۇنيا ئۇيغۇر قۇرۇلتىيىنىڭ باياناتچىسى دىلشات رىشىت بۈگۈن بۇ ھەقتە رادىئومىزغا بايانات بېرىپ، خىتاي دائىرىلىرىنىڭ يۇقىرىقى قائىدە ۋە تەدبىرلىرىنى «شەرقى تۈركىستان ۋەزىيىتىنىڭ ھېلىھەم جىددىيلىكىنىڭ بىر ئىپادىسى» دەپ كۆرسەتتى. ئۇ يەنە خىتاي ھۆكۈمىتىنى ھاكىمىيەت باشقۇرۇش جەھەتتىكى ئىپتىدائىيلىقى بىلەن ئەيىبلىدى.