Хәлқара кәчүрүм тәшкилати хитайдин 4 - июн тйәнәнмен вәқәсини ашкара ениқлашни тәләп қилди

4 - Июн тйәнәнмен оқуғучилар һәрикитиниң 20 йиллиқи һарписида, хәлқара кәчүрүм тәшкилати баянат елан қилип, хитай һөкүмитидин 4 - июн тйәнәнмен вәқәси һәққидә очуқ ‏ - ашкара тәкшүрүш елип беришни тәләп қилди.
Мухбиримиз гүлчеһрә
2009.06.02

Хәлқара кәчүрүм тәшкилатиниң 2 - ийон сәйшәнбә елан қилған бу баянатида йәнә шундақла, тйәнәнмин анилири тәшкилатиниң рәһбири диң зилин қатарлиқларниң һазирға қәдәр хитай сақчилириниң паракәндичиликидин қутулалмай келиватқанлиқини алаһидә тилға елип, хитай даирилириниң 4 - ийон вәқәсиниң һәқиқити һәққидики издәнгүчиләргә қаратқан қаттиқ қоллуқ билән бастуруш сияситини әйиблигән.

Мәзкур баянатта көрситилишичә, толуқ болмиған мәлуматларға асасланғанда, һазирғичә аз дегәндә 20 киши хитайда 4 - июн вәқәсигә мунасивәтлик болғанлиқи үчүн түрмиләргә қамалған.

Мәзкур тәшкилат өткән айда хитай хәлқ вәкиллири қурултийи мудири ву баңгоға очуқ хәт йоллап мәсулийәтни тонуп 4 ‏ - июн вәқәсидә өлтүрүлгән вә қамаққа елинғанларниң статистикисини ениқлашни тәләп қилған иди.

20 - Йил илгири хитайда йүз бәргән мәзкур паҗиә һазирға қәдәр дуняниң диққитини тартип келиватқан вәқә болуп, һалбуки хитай даирилири йеқиндин буян бейҗиңни мәркәз қилип бихәтәрлик тәдбирлирини алаһидә күчәйткән шундақла чәтәл мухбирлириниң 4 - июн вәқәси һәққидә зиярәт елип беришини қаттиқ чәклимәктә икән.

Б б с ниң бүгүнки хәвиригә қариғанда, сәйшәнбә күни аз дегәндә төт хәлқаралиқ ахбарат органлириниң бейҗиңда турушлуқ мухбирлири тйәнәнмен анилирини зиярәт қилиш җәрянида,хитай сақчилириниң тосқунлуқиға учриған. Арида бир опиратор сақчиханида икки саәт сорақ қилинғандин кейин қоюп берилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.