Xelq'ara kechürüm teshkilati xitaydin 4 - iyun tyen'enmén weqesini ashkara éniqlashni telep qildi

4 - Iyun tyen'enmén oqughuchilar herikitining 20 yilliqi harpisida, xelq'ara kechürüm teshkilati bayanat élan qilip, xitay hökümitidin 4 - iyun tyen'enmén weqesi heqqide ochuq ‏ - ashkara tekshürüsh élip bérishni telep qildi.
Muxbirimiz gülchéhre
2009-06-02
Share

Xelq'ara kechürüm teshkilatining 2 - iyon seyshenbe élan qilghan bu bayanatida yene shundaqla, tyen'enmin aniliri teshkilatining rehbiri ding zilin qatarliqlarning hazirgha qeder xitay saqchilirining parakendichilikidin qutulalmay kéliwatqanliqini alahide tilgha élip, xitay da'irilirining 4 - iyon weqesining heqiqiti heqqidiki izden'güchilerge qaratqan qattiq qolluq bilen basturush siyasitini eyibligen.

Mezkur bayanatta körsitilishiche, toluq bolmighan melumatlargha asaslan'ghanda, hazirghiche az dégende 20 kishi xitayda 4 - iyun weqesige munasiwetlik bolghanliqi üchün türmilerge qamalghan.

Mezkur teshkilat ötken ayda xitay xelq wekilliri qurultiyi mudiri wu banggogha ochuq xet yollap mes'uliyetni tonup 4 ‏ - iyun weqeside öltürülgen we qamaqqa élin'ghanlarning statistikisini éniqlashni telep qilghan idi.

20 - Yil ilgiri xitayda yüz bergen mezkur paji'e hazirgha qeder dunyaning diqqitini tartip kéliwatqan weqe bolup, halbuki xitay da'iriliri yéqindin buyan béyjingni merkez qilip bixeterlik tedbirlirini alahide kücheytken shundaqla chet'el muxbirlirining 4 - iyun weqesi heqqide ziyaret élip bérishini qattiq cheklimekte iken.

B b s ning bügünki xewirige qarighanda, seyshenbe küni az dégende töt xelq'araliq axbarat organlirining béyjingda turushluq muxbirliri tyen'enmén anilirini ziyaret qilish jeryanida,xitay saqchilirining tosqunluqigha uchrighan. Arida bir opirator saqchixanida ikki sa'et soraq qilin'ghandin kéyin qoyup bérilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet