Amérika afghanistan'gha yene 30 ming esker ewetishni pilanlimaqta

Général mayk mulen afghanistanning paytexti kabul shehiri yénidiki amérika herbiy bazisida ötküzgen muxbirlarni kütüwélish yighinida bergen bayanatida, amérika mudapi'e ministirlikining afghanistan'gha 20 bilen 30 ming etrapida qoshumche amérika herbiy qisimliri ewetishni pilanlawatqanliqini, bildürdi.

Lékin u bayanatida, afghanistanda tinchliqni qaytidin tiklesh üchün, amérika herbiy qisimlirining sanini köpeytishning yéterlik bolalmaydighanliqini, afghanistanda tinchliq we turaqliqni ornitish üchün, bu döletning iqtsadiy we ijtima'iy tereqqiyatigha alahide köngül bölünüshi kéreklikini tekitlidi.

Nöwette afghanistanda 31 ming amérika herbiy qisimliri pa'aliyet élip bériwatqan bolup, taliban qalduqlirining afghan milliy armiyisi we afghanistandiki ittipaqdash armiye qisimlirigha qaratqan hujumlirini künséri kücheytishi, amérika hökümitini afghanistandiki herbiy qisimlirini köpeytishke mejburlighan.

Amérika birleshme agéntliqining xewer qilishiche, 2008‏- yili afghanistandiki amérika herbiy qisimliri üchün eng qanliq yil hésablinidiken. Amérika herbiy qisimliri 2001‏- yilidin yeni afghanistandiki talibanlar hakimiyiti gumran bolghandin buyan mushu yil ichide eng köp qurban bergen.

Taliban qalduqliri, özini öltürüwélish xaraktérlik hujumlar, partiltish heriketliri arqiliq afghanistandiki amérika we ittipaqdash armiye qisimlirini nurghun ziyan'gha uchratqan hemde yéza qishlaqlardiki heriketlirini kéngeytip, afghanistanning paytexti kabul shehirige tehdit qilishqa bashlighan.