Amérika portigaliyining güentanamo toghrisidiki teklipini qarshi aldi

Amérikining urush jinayetchiliri ishlirigha mes'ul bash elchisi klint willi'amson, portigaliyining teklipini güentanamodiki dölitige qaytalmaydighan tutqunlargha yéngi makan tépishtiki zor ilgirilesh, dep tekitligen.

 Güentanamo lagirida yétiwatqan 250 neper tutqunning ichidiki17 neper Uyghurni öz ichige alghan 50 tek kishi dölitige qaytsa bolmaydighan kishiler, dep qaralmaqta we amérika bu kishilerni jaylashturidighan 3 - bir dölet izdimekte idi. Portigaliye tashqi ishlar ministiri lu'is amado yawropa ittipaqi tashqi ishlar ministirlirigha xet yézip, güentanamodiki dölitige qaytalmaydighan tutqunlarni yawropa ellirige orunlashturushni tewsiye qilghan. Bash elchi willi'amson," biz bu teklipni qarshi alimiz.

Biz bu mesile toghrisida 70 din artuq dölet bilen uchrashqan. Men bir türküm döletlerni ziyaret qilip, mexsus bu mesilini otturigha qoyghan idim " deydu.

Portigaliye tashqi ishlarministiri amado yawropa elliri tashqi ishlar ministirlirigha yollighan mektubida yawropa ittipaqi" amérika hökümiti'ining güentanamo lagirini taqishigha yardem qilish niyiti barliqini ipadileydighan éniq signal bérishi kérek" dégen.

Güentanamodiki Uyghur tutqunlarning adwokatliri güentanamodiki achquchluq mesilining Uyghurlarni qandaq bir terep qilish mesilisi ikenlikini ilgiri sürmekte. Willi'amson birleshme agéntliqigha bergen bu heqtiki melumatida amérikining portigaliye we bashqa yawropa döletliri bilen Uyghurlarmesilisini muzakire qilghanliqini bildürgen, lékin muzakirining tepsiliy mezmuni toghrisida toxtilishni ret qilghan.