Америка, гуантанамодики уйғурларни хитайға қайтурмайдиғанлиқини йәнә бир қетим тәкитлиди

Америка һөкүмити гуантанамода тутуп турулуватқан уйғурларниң хитайға қайтурулмайдиғанлиқини йәнә бир қетим тәкитлиди.
Мухбиримиз өмәр қатат
2008-12-24
Елхәт
Пикир
Share
Принт

Америка ташқи ишлар минситирлиқиниң баянатчиси маккормек сәйшәнбә күни вашингтонда өткүзүлгән мухбирларни күтүвелиш йиғинида бәргән баянатида, гуантанамода тутуп турулуватқан уйғур мәһбусларниң хитайға қайтурулмайдиғанлиқини тәкитләп мундақ дегән " биз хитай һөкүмитиниң бу мәсилидики мәйданини билимиз. Лекин бизниң қаришимизчә, бундақ бир пәйттә гуантанамода тутуп турулуватқан кишиләрни хитайға қайтуруш чүшәнчисииз һәрикәт һесаблиниду."

Америка һөкүмити, яврупа дөләтлириниң гуантанамода тутуп турулуватқан уйғурларни қобул қилишни ойлишиватқанлиқи тоғрисида чиққан хәвәрләрдин наһайити хурсән икәнликини әскәрткән маккормек, " өз юртлириға қайтурулидиған мәһбусларниң һечқандақ шәклидә начар муамилигә учримайдиғанлиқиға ишинишимиз керәк" деди.

Германийә қатарлиқ яврупа дөләтлири америка президент вәзиписигә сайланған барак обаманиң гуантанамо һәрбий түрмисини тақаш вәдисини әмәлгә ашурушиға ярдәм қилиш үчүн гуантанамода тутуп турулуватқан мәһбусларниң бир қисимини, болупму уйғур мәһбусларни қобул қилишни ойлишиватқанлиқини җакарлиғандин кейин, хитай һөкүмити баянат елан қилип америка һөкүмитидин гуантанамода тутуп турулуватқан 17 нәпәр уйғур мәһбусни хитайға қайтурушини йәнә бир қетим тәләп қилған иди.

Гуантанамода тутуп турулуватқан уйғур мәһбусларни террорчи вә шәрқий түркистан исламий һәрикити әзаси дәп көрсәткән хитай ташқи ишлар минситирлиқиниң баянатчиси чин гаң дүшәнбә күни бейҗиңда мухбирларға бәргән баянатида, хитай һөкүмитиниң һәр қандақ бир дөләтниң уйғур мәһбусларни қобул қилишиға қарши чиқидиғанлиқини әскәртип, уларниң хитайға қайтурулиши керәкликини тәкитлигән иди.

Пикирләр (0)
Share
Толуқ бәт