Amérika, gu'antanamodiki Uyghurlarni xitaygha qayturmaydighanliqini yene bir qétim tekitlidi

Amérika hökümiti gu'antanamoda tutup turuluwatqan Uyghurlarning xitaygha qayturulmaydighanliqini yene bir qétim tekitlidi.
Muxbirimiz ömer qatat
2008-12-24
Élxet
Pikir
Share
Print

Amérika tashqi ishlar minsitirliqining bayanatchisi makkormék seyshenbe küni washin'gtonda ötküzülgen muxbirlarni kütüwélish yighinida bergen bayanatida, gu'antanamoda tutup turuluwatqan Uyghur mehbuslarning xitaygha qayturulmaydighanliqini tekitlep mundaq dégen " biz xitay hökümitining bu mesilidiki meydanini bilimiz. Lékin bizning qarishimizche, bundaq bir peytte gu'antanamoda tutup turuluwatqan kishilerni xitaygha qayturush chüshenchisi'iz heriket hésablinidu."

Amérika hökümiti, yawrupa döletlirining gu'antanamoda tutup turuluwatqan Uyghurlarni qobul qilishni oylishiwatqanliqi toghrisida chiqqan xewerlerdin nahayiti xursen ikenlikini eskertken makkormék, " öz yurtlirigha qayturulidighan mehbuslarning héchqandaq sheklide nachar mu'amilige uchrimaydighanliqigha ishinishimiz kérek" dédi.

Gérmaniye qatarliq yawrupa döletliri amérika prézidént wezipisige saylan'ghan barak obamaning gu'antanamo herbiy türmisini taqash wedisini emelge ashurushigha yardem qilish üchün gu'antanamoda tutup turuluwatqan mehbuslarning bir qisimini, bolupmu Uyghur mehbuslarni qobul qilishni oylishiwatqanliqini jakarlighandin kéyin, xitay hökümiti bayanat élan qilip amérika hökümitidin gu'antanamoda tutup turuluwatqan 17 neper Uyghur mehbusni xitaygha qayturushini yene bir qétim telep qilghan idi.

Gu'antanamoda tutup turuluwatqan Uyghur mehbuslarni térrorchi we sherqiy türkistan islamiy herikiti ezasi dep körsetken xitay tashqi ishlar minsitirliqining bayanatchisi chin gang düshenbe küni béyjingda muxbirlargha bergen bayanatida, xitay hökümitining her qandaq bir döletning Uyghur mehbuslarni qobul qilishigha qarshi chiqidighanliqini eskertip, ularning xitaygha qayturulishi kéreklikini tekitligen idi.

Toluq bet