Amérikidiki Uyghurlar roza héytni kütüwaldi

Bu yilqi roza héyt namizi amérikining her qaysi jaylirida jümlidin paytext washin'gton etrapidiki musulman jama'etlirining meschitliride ötküzülgendin bashqa yene amérika - türk dostluq jemiyiti dep atalghan jemiyetning teshkillishi bilen washin'gton shehiri yénidiki shimaliy wirjiniye shitatining fa'irfakis sheherlik ottura mektepning tenterbiye zalidimu uyushturulghan bolup, namazgha paytext etrapida yashaydighan türkler we az sandiki qazaqlar hem özbéklerdin bashqa yene köp sandiki Uyghurlar ishtirak qildi.

Amérika Uyghurliri jem'iyitining munasiwetlik erbablirining éytishiche, bu amérikidiki Uyghurlarning yéqinqi yillardin buyanqi tunji qétim eng köp adem qatniship, birlikte héyt namizi oqushi bolup hésablinidiken. Namazdin kéyin, Uyghurlar bir - birini héyt bilen qizghin tebrikleshti shuningdek Uyghur xelqining milliy örp - adetliri boyiche jama'et bolup uyushup bir qisim a'ililerge pete oqudi.

Héyt namizigha qatnashqan kishilerning éytishiche, 5 - we 7 - iyul qirghinchiliqliridin kéyin chet'ellerdiki, jümlidin amérikidiki Uyghurlar arisida téximu ittipaqlishish, bir - birini qedirlesh, öz milliy we dini kimliklirini kücheytish keypiyatliri ewj élishqa bashlighan. Amérika - türk dostluq jem'iyiti ramizan mezgilide Uyghurlargha iptar bérip, hal sorighan idi.