Ақсуда һөкүмәткә қарши тәшвиқат вәрәқилири тарқалди, ақсу вәзийити җиддийләшти
2011.08.08
Дилшат ришитниң билдүрүшичә, ақсу даирилириниң рамзан кириштин илгири һөкүмәт даирилириниң райондики уйғурларға қаратқан сақал қоймаслиқ, ромал артмаслиқ, роза тутмаслиқ қатарлиқ чәклимиләр уйғурларниң наразилиқини күчәйтивәткән.
Уйғурлар тәрипидин тарқитилған тәшвиқат вәрәқилиридә, уйғурларниң наразилиқлири ипадиләнгәндин башқа, хитайдин кәлгән көчмәнләрниң өз юртиға қайтип кетиши тәләп қилинған, уйғурлар бирлик-иттипақлиққа чақирилған.
Йәнә дилшат ришитниң билдүрүшичә, хитай сақчилириниң 5-авғуст йәни җүмә күни кечидики тәкшүрүшидә, ават наһийисидики 31 яшлиқ қасим хоҗамнияз исимлик уйғур, сақал қойғини үчүн сақчилар тәрипидин таяқ йегән һәм сақили мәҗбурий чүшүрүветилгән.
Радиомиз ақсу аһалиләр вә сақчи даирилиригә телефон қилип әһвал игилигинидә, даириләр тәшвиқат вәрәқилири тарқалғанлиқи һәққидики хәвәрни инкар қилиш билән биллә, уйғурларға қарита ахтуруш елип берилғанлиқини инкар қилди; аһалиләр болса рамзан киргәндин буян ақсу вәзийитиниң җиддийләшкәнликини, уйғурларға қарита кимлик тәкшүрүшиниң йәниму күчәйтилгәнликини ашкарилиди.