كىرىستوفېر سىمىت قاتارلىق ئامېرىكا دۆلەت مەجلىسى ئەزالىرى ئارزۇگۇل ۋەقەسىنى داۋاملىق كۆزىتىدۇ

ئۇلار ئامېرىكا دۆلەت مەجلىسىگە، خىتاي ھۆكۈمىتىنىڭ كىشىلىك ھوقۇقنى دەپسەندە قىلىشىنى توختىتىش ۋە خىتاينىڭ بىرلەشكەن دۆلەتلەر تەشكىلاتىنىڭ نوپۇس فوند پروگراممىلىرىدىن كىشىلىك ھوقۇقنى دەپسەندە قىلىش ئۈچۈن پايدىلىنىپ كېتىشىدىن ساقلىنىش ئۈچۈن، ئامېرىكا ھۆكۈمىتىنىڭ ھەممە ئىمكانىيەتلەردىن پايدىلىنىپ ھەرىكەت قوللىنىشىغا ھەيدەكچىلىك قىلىپ تۇرۇشنىڭ زۆرۈرلۈكىنى كۆرسەتتى.

كىرىستوفېر سىمىت قاتارلىق ئامېرىكا دۆلەت مەجلىسى ئەزالىرى بۈگۈنكى باياناتىدا يەنە، خىتايدا ئارزۇگۈلدەك ئاياللارنىڭ تېخى تۇغۇلمىغان بالىلىرىنىڭ خىتاي ھۆكۈمىتى تەرىپىدىن گۆرگە كۆمۈۋېتىلىشىگە ۋە ھامىلىنى ئالدۇرۇش ئارقىلىق ئانىلارنىڭ سالامەتلىكىنى زىيانغا ئۇچرىتىشقا قارشى داۋاملىق كۆرەش قىلىدىغانلىقىنى بىلدۈردى.

كىرىستوفېر سىمىت قاتارلىق ئامېرىكا دۆلەت مەجلىسى ئەزالىرى بۇنىڭدىن بىر نەچچە كۈن بۇرۇن، ئارزۇگۈلنىڭ قورسىقىدىكى بالىنى ساقلاپ قېلىش ئۈچۈن، خىتاينىڭ ئامېرىكىدىكى باش ئەلچىسى جاۋ ۋېنجۇڭ ۋە ئامېرىكىنىڭ خىتايدىكى باش ئەلچىسى كىلارك راند بىلەن بىۋاستە سۆزلەشكەن ئىدى.