Америка авам палатаси ақсарайниң агаһландурушиға қаримай, тор бихәтәрлик қануни мақуллиди

Америка авам палатаси пәйшәнбә күни ақсарайниң агаһландурушиға қаримай, тор бихәтәрлик қануни мақуллиди.
Мухбиримиз әркин
2012.04.27

Мәзкур қанун лайиһисидә карханилар билән бихәтәрлик органлириниң өз-ара тор бузарлириға даир учур алмаштурушиға йол қоюлған. Бирақ ширкәтләр билән бихәтәрлик органлириниң тор абонтлириниң шәхси учурини өз-ара алмаштурушиға йол қоюлған мәзкур қанунға америка хәлқ һоқуқи тәшкилатлири қарши чиққан.

Улар тор абонтлириниң шәхси учурини бихәтәрлик органлири билән алмаштуруш кишилик һоқуққа дәхли-тәруз йәткүзүшидин әндишә қилидиғанлиқини билдүргән.
Мәзкур қанун лайиһиси авам палатасиниң 248 әзасиниң қоллиши, 168 әзасиниң қарши туруши билән мақулланған.

Мәзкур қанун лайиһисини оттуриға қойған авам палата истихбарат комитетиниң җумһурийәтчи вә демократчи әзалири шу күни баянат елан қилип, мәзкур қанун һәр икки партийә мәнсуплири тәрипидин бирдәк қоллашқа еришкәнликини махтиған шундақла униң “америка ширкәтлирини хәтәрлик иқтисади күшәндиләрдин техиму яхши қоғдайдиғанлиқи” ни билдүргән.

Бирақ ақсарай, мәзкур қанун лайиһисидә “тор абонтлириниң хусуси турмуши, шәхси мәхпийәтлики, кишилик әркинлики йетәрлик капаләткә игә қилинмиғанлиқи” ни илгири сүрүп, мәзкур қанун лайиһисигә қарши чиққан иди. Ақсарай чаршәнбә күни елан қилған баянатида авам палатасини агаһландуруп, мәзкур қанун мақулланса, президентниң имза қоюшни рәт қилидиғанлиқидин бешарәт бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.