“Shinjang géziti” Uyghurlarni ayropilan bulimasliqqa chaqirip obzor élan qildi

“Jama'et bixeterlikige ziyan yetküzgenler jezmen qattiq jazalinidu” namliq obzorda aldi bilen xotendiki 29 - iyun ayropilan bulash weqesini sadir qilghan musa yüsüp qatarliq kishilerge ölüm jazasi bérilgenliki tilgha élin'ghan؛ arqidin awi'atsiye qatnishida bixeterlikning intayin muhimliqi tekitilinip, ayropilan bulashqa oxshash weqelerning jem'iyetke we insaniyetke qarshi jinayi qilmish ikenliki we dunyada herqandaq döletning bu xil qilmishlarni epu qilmaydighanliqi eskertilgen.

Obzorning axirida kishiler qanunni hörmetleshke, qanundin héyiqishqa chaqirilghan. Shinjang gézitining ayropilan bulash weqesi heqqide mexsus obzor élan qilishi muhajirettiki Uyghur közetküchilerning diqqitini tartti, bezi közetküchiler mezkur obzorni xitay da'irilirining ayropilan bulash weqesidin qattiq chöchigenlikining ipadisi dep körsetse, yene bezi közetküchiler, rayonda yüz bériwatqan bu tür heriketlerni obzor arqiliq toxtatqili bolmaydighanliqini, buni toxtitishning birdin - bir yoli heq we adaletke hörmet qilish ikenlikini ilgiri sürüshti.