Б д т бихәтәрлик кеңиши корийә йерим арили мәсилиси һәққидә җиддий йиғин ачти

Йәкшәнбә күни бирләшкән дөләтләр тәшкилатиниң бихәтәрлик кеңиши җиддий йиғин чақирип, корийә йерим арили кризисини музакирә қилди.
Мухбиримиз үмидвар
2010.12.19
Русийиниң хәвәрләр агентлиқиниң йезишичә, б д т бихәтәрлик кеңишиниң җиддий йиғини русийә тәрәпниң тәшәббуси бойичә ечилған болуп,  йиғинда икки корийиниң өзлирини тутувелиши чақирилди.
 
Буниңдики сәвәб, алдинқи күни җәнубий корийә  һәрбий даирилириниң шималий корийиниң зәмбирәк һуҗумиға учриған йонпхендо арилида һәрбий маневир өткүзүш пиланини елан қилиши  болуп, җәнубий корийә агаһландурушларға қаримай, дүшәнбә яки сәйшәнбә күнлири әгәр һава килимати яр бәрсила һәрбий маневирни башлайдиғанлиқини җакарлиған.
 
Җәнубий корийиниң мәзкур аралда һәрбий маневир өткүзүш пилани шималий корийә тәрәпниң җиддий агаһландурушиға дуч кәлгән болуп, б б с агентлиқиниң хәвәр қилишичә, шималий корийә тәрәп әгәр җәнубий корийә һәрбий маневир өткүзсә, өзлириниң " қайтурма зәрбә бериши" мумкинликини, қайтурма зәрбә беришниң күчи вә даириси  алдинқи қетимлиқ мәзкур аралға зәмбирәк етиштин ешип кетидиғанлиқидин бешарәт бәргән. Әмма, җәнубий корийә қәтий чекинмәйдиғанлиқини билдүргән.
 
Мәзкур һәрбий маневирниң икки корийә арисида уруш вәзийити яритишидин әнсиригән  б д т бихәтәрлик кеңиши җиддий йиғин чақирип, пйоңяң билән сеулни өзлирини тутувелишқа чақирған.

Буниңдин илгири русийә һөкүмити җәнубий корийини мәзкур аралда һәрбий маневир қилмаслиққа чақирған иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.