Hindistan pakistandin térror gumandarlirini tutup bérishni telep qildi

Aldinqi hepte bombayda yüz bergen 175 ademning ölüshi yene 300 ge yéqin ademning yarilinishini keltürüp chiqarghan térror hujumliridin kéyin hindistan hökümiti 2 - dékabir, mezkur térrorluq hujumlirigha qatnashqan dep békitilgen térror gumandarining tizimlikini élan qilip, pakistandin bu tizimliktikilerni tapshurup bérishni resmiy telep qildi.
Muxbirimiz gülchéhre
2008-12-02
Share

Birleshme agéntliqining seyshenbe xewiride körsitishiche, hindistan tashqi ishlar ministirliki seyshenbe achqan muxbirlarni kütiwélish yighinida, tizimliktiki isimlarni élan qilmighan bolsimu,hindistan hökümiti teripidin tutush buyruqi chiqirilghan bu tizimdikilerning 20 nepirining pakistan tewelikide ikenlikini,pakistan hökümitidin bu térror gumandarlirini derhal tutup hindistan'gha tapshurup bérishni qattiq telep qilghanliqini bildürgen.

Hindistan axbaratlirining ashkarilishiche, hindistan hökümiti teripidin tutush buyruqi chiqirilghanlar ichide bombayda 1993 - yili yüz bergen 250 ademning ölüshige seweb bolghan partilitishning pilanlighuchisi dawut ibrahim we yene 1999 - yilida hindistan hawa yollirida ayropilan bulash weqesini keltürüp chiqarghan mes'ud ezher qatarliqlar bar iken.

Hindistan da'irliri bularni ötkenki heptidiki bombay térror hujumlirigha biwaste qatnashmighan teqdirdimu, mushu weqelerde ularning qoli bar dep qarimaqta iken. Hindistan alte yil ilgirila bu tutush buyruqi tizimlikini pakistan'gha bir qétim tapshurghan.

Hindistan bixeterlik da'iriliri bu nöwet bombay shehiride yüz bergen térrorluq hujumni, keshmir rayonining hindistan bilen élip bériwatqan urushlirigha yardem bérish üchün pakistan jasusluq organliri teshkillep chiqqan "leshkeri ta'ibe" teshkilati ezaliri teshkilligen dep qarimaqta idi.

Hindistan pakistan 1947 - yili musteqil bolghandin buyan keshmir mesilisi tüpeyli üch qétim öz ara urush achqan nöwette ikki dölet munasiwiti qaytidin ixtilapqa yüzlendi. Hazir bu ikkila dölet yadro qorallirigha ige.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet