Uyghur rayonining jenubi chang-tozanliq boran apitige uchrighan

Shinxu'a torining bergen xewirige qarighanda, qeshqer wilayitidiki 12 nahiye shundaqla qizilsu, aqsu we xoten wilayetlirining hemmisi chang-tozanliq boranning tesirige uchrighan.

Bir qanche kündin buyan asmanni qaplap ketken qoyuq chang-tozan sewebidin kishilerning turmushigha éghir qulaysizliqlar peyda bolghan.

Igilinishiche, bu qétimliq boran apiti nechche on yildin béri körülgen eng éghir boran apiti bolup, apet bu rayonlarning yéza igilik, ormanchiliq ishlirigha belgilik derijide ziyan salghan.

Shinxu'a agéntliqi xewiride, chang-tozanliq boranning sewebi tarim wadisining topiliq shundaqla qurghaqchiliq eng éghir bolghan bir rayon bolushi we nemlik nisbitining töwen bolushidek amillar bilen baghlap körsitilgen.

Emma, chet'ellerdiki Uyghur közetküchiler bolsa, buning tarim oymanliqining ékologiyilik muhitining éghir derijide buzulushi bilen munasiwetlik ikenlikini ilgiri sürmekte.

Ular mol su menbesige ige bolghan tarim deryasi wadisigha jaylashqan xitay ishlepchiqirish qurulush armiyisining su menbeliridin xalighanche paydilinip, qalaymiqan boz yer échishi netijiside ékologiyilik muhitning éghir derijide buzghunchiliqqa uchrap, tarim wadisida yuqiriqidek her xil tebi'iy apetlerning meydan'gha kéliwatqanliqini otturigha qoymaqta.