Qaghiliq nahiyiside qanunsiz diniy pa'aliyetlerni nazaret qilishta xizmet körsetkenler teqdirlendi

Dunya Uyghur qurultiyi teminligen uchurgha qarighanda, bu chong yighin'gha yéza ahalisi, yéza kadir-rehberliridin bolup jem'iy 600-500 etrapida kishi qatnashqan. Yéza rehberlik da'iriliri yéza ahalisining diniy pa'aliyetlirini bashqurush, nazaret qilish üchünla her sahe kishilerdin 200 kishini mexsus nazaretchilikke qoyghan bolup, bu nazaretchilerning bir qismi shu kündiki chong yighinda mukapatlan'ghan.

Dunya Uyghur qurultiyining bayanatchisi dilshat rishitning bildürüshiche, bu 200 nazaretchi yézida öymu-öy kirip ehwal igilesh, nazaret qilish, da'irilerge uchur yetküzüsh bilen shughullan'ghan. U, Uyghur xelqi uchrawatqan diniy bésimning Uyghurlarni nepes alghusiz derijige ekélip qoyghanliqini bildürüp, xitay hökümitidin bu siyasitini derhal ayaghlashturushni telep qildi.

Xitay da'iriliri Uyghur élide yillardin buyan qanunsiz diniy pa'aliyetlerge zerbe bérip kelgen bolsimu, emma ularning qandaq diniy pa'aliyetning qanunsiz hésablinidighanliqi heqqide éniq chüshenche bermey, Uyghurlarning eng eqelliy din'gha ishinish erkinlikini, hetta ayallarning yaghliq chigishi, erlerning saqal qoyushinimu qanunsiz diniy pa'aliyet katégoriyiside bir terep qilishi kishilik hoquq organlirining qattiq tenqid qilishigha uchrimaqta.