Xitay da'iriliri emgek bilen özgertish tüzümining islah qilinidighanliqini bildürdi

Saqchilargha bérilgen bu xil hoquq öktichilerni, kishilik hoquq dewagerlirini, diniy zatlarni jazalash we basturushning keskin qoraligha aylinip qalghan. Hökümetni tenqid qilghan yaki tüzümge boy sunushni ret qilghan nurghun kishi emgek lagérlirigha solinip basturulghan idi. Shunga bu tüzüm xelq'ara kishilik hoquq teshkilatlirining izchil tenqidige uchrap kelgen.

Xitay “Qanun géziti” ning xewer qilishiche, xitay merkizi siyasiy qanun komitétining sékrétari ming jyenju bir qétimliq yighinda emgek bilen özgertish tüzümining bikar qilinidighanliqini bildürgen. Biraq xewerde, bu tüzümning qandaq bikar qilinidighanliqi heqqidiki tepsiliy détallar tilgha élinmighan. Shunga kishilik hoquq teshkilatliri uninggha ijabiy baha bergen bolsimu, biraq yenila éhtiyatchanliq bilen mu'amile qilmaqta.

Kishilik hoquq teshkilatlirining ilgiri sürüshiche, emgek bilen özgertish tüzümi bikar qilin'ghan teqdirdimu, emgek lagérliri we lagérlardiki mehbuslarning qandaq bir terep qilinidighanliq mesilisi bar. Ular, emgek lagérliri pütünley taqilamdu yaki saqlap qélinip, kishilerni sotning hökümi arqiliq qamashqa özgertemdu, dégen mesilini dawamliq közitishke toghra kélidighanliqini bildürdi.