Японийә билән филиппин хәвпсизлик җәһәттики һәмкарлиқини күчәйтмәкчи

Японийә ташқи ишлар вәзири фумию кишида пәйшәнбә күни филиппинда рәсмий зиярәттә болди. Униң бу қетимлиқ зиярити асаслиқ филиппин болған һәрбий мудапиә һәмкарлиқини күчәйтишни мәқсәт қилидикән.
Мухбиримиз ирадә
2013.01.10

Филиппин ташқи ишлар министири алберт росарио японийә ташқи ишлар вәзири билән өткүзгән учришиштин кейин мухбирларға бәргән баянатида, хитайниң деңиз тәвәлики мәсилисидики позитсийисиниң асияниң тинчлиқиға тәһдит пәйда қиливатқанлиқини, хитайниң җәнубий деңиздики бу хил “хәтәрлик” һәрикәтлириниң әндишә пәйда қиливатқанлиқини билдүргән.

Японийә вә филиппин һәр иккилиси хитай билән игилик һоқуқ күриши қиливатқан дөләтләр болуп, хитайниң йеқиндин буян һәм җәнубий деңизда, һәм шәрқий деңизда пәйда қиливатқан иғвагәрчилик һәрикәтлири бу дөләтләрниң қаттиқ наразилиқини қозғиған иди. Филиппин ташқи ишлар министири японийә, филиппин икки тәрәпниң бундин кейин хәвпсизлик җәһәттики алақини күчәйтидиғанлиқини, японийиниң филиппин деңиз чегра мудапиә даирилирини 10 чарлиғучи парахот вә йеңи алақилишиш системиси билән тәминләшни ойлишидиғанлиқини билдүргән.

Японийә ташқи ишлар вәзири фумию кишида сөзидә икки дөләт һәмкарлиқиниң районниң тинчлиқи үчүн интайин муһим әһмийәткә игә икәнликини тәкитлигән.

Хитайниң қошна дөләтләр билән болған игилик һоқуқ зиддийити күнсайин кәскинләшмәктә. Һазир хитайдин тәһдит һес қилған бу дөләтләрниң өз мәнпәитини қоғдаш үчүн җиддий тәдбир елишқа һәрикәт қиливатқанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.