فىلىپپىن ساقچى دائىرىلىرى ئاپتوموبىلدىكى كىشىلەرنى قۇتقۇزۇشقا ھەرىكەت قىلغان. ئەمما جىنايەتچى مېندوزا گۆرۈگە ئېلىنغانلارنى ئۆلتۈرۈش بىلەن ساقچىلارغا تەھدىت قىلغان. ئۆزىمۇ بۇرۇن ساقچى بولغان مېندوزا ساقچىلارنىڭ تاكتىكىلىرىنى ياخشى بىلگەنلىكتىن ئۇنى كونترول ئاستىغا ئېلىش ئاسانغا توختىمىغان.
نەتىجىدە 10 سائەت داۋام قىلغان تىركىشىشتىن كېيىن قاتىل ساقچىلار تەرىپىدىن ئېتىپ ئۆلتۈرۈلگەن. ۋەقەدە 9 خوڭكوڭلۇق ئۆلگەن، ئىككىسى ئېغىر يارىلانغان.
بۈگۈن خوڭكوڭ ھۆكۈمىتى بايانات ئېلان قىلىپ، فىلىپپىندىكى ۋەقەدىن قاتتىق ئەپسۇسلانغانلىقىنى بىلدۈردى. ھۆكۈمەت دائىرىلىرى "قارا سىگنال" ئېلان قىلىپ، فىلىپپىنگە بارىدىغان ساياھەتچىلەرنى بىخەتەرلىك ھەققىدە ئاگاھلاندۇردى.
ئىگىلىنىشىچە، ئەسلىدە ساقچى ئوفىتسېرى بولغان جىنايەتچى رولاندو مەندوزا ئىلگىرى زەھەر ئەتكەسچىلىكى ۋە چىرىكلىك سەۋەبىدىن ئىشتىن چىقىرىلغان بولۇپ، ئۇ ئۆزىنىڭ ئاقلىنىشىنى ۋە ئىشقا قايتىشنى تەلەپ قىلىپ، مەزكۇر ۋەقەنى سادىر قىلغان.