Ghuljida bir qisim Uyghurlar bilen saqchilar otturisida toqunush yüz berdi

Melumatlargha qarighanda, weqe bir hepte awwal yüz bergen bolup, ghuljining xenbing yéziliq saqchixanisining saqchiliri qizil bayraq sariyining yénidiki " altun alma ashxanisi" da Uyghurlarni tutqun qilghan. Bu jeryanida saqchilar Uyghurlarni qattiq urghan. Ashxana sirtida ehwalni körüp turghan nechche on Uyghur buningdin qattiq narazi bolghan we ularni urmasliqni telep qilghan. Netijide saqchilar bilen bu Uyghurlar arisida toqunush meydan'gha kelgen. Ghezepke kelgen Uyghurlar saqchi aptomobillirini örüwetken. Weqe jeryanida 3 Uyghur yarilan'ghan.

Dilshat rishit ependining bildürüshiche, saqchilar toqunush jeryanida asman'gha qaritip oq chiqarghan we köz yashartquch bomba atqan. Neq meydanda 9 kishini qolgha alghan. Weqedin kéyin xitay da'iriliri barliq kochilarni qattiq qamal qilghan.

Istansimiz muxbiri ghuljidiki mezkur altun alma ashxanisigha téléfon qilghinida, téléfonni alghan bir Uyghur xizmetchi xadim ashxanida heqiqeten shundaq weqe yüz bergenlikini, saqchilarning pütün ashxanining etrapini qamal qiliwalghanliqini éytip bergen.

Dilshat rishit ependi ürümchi weqesidin kéyin xitay hökümitining saqchi da'irilirining Uyghurlarni xalighanche tutushigha, ularni urushigha téximu keng yol qoyup bériwatqanliqini, saqchilarning Uyghurlarni xalighanche parakende qilidighanliqini bildürdi.