Ғулҗа наһийисиниң дадамту йезисида һәр бир кочиға бирдин 'сақчи - хәлқ алақилишиш нуқтиси' қурулидикән

Хитай даирилири ғулҗа наһийисиниң дадамту йезисида башқуруш вә назарәт қилишни һәссиләп ашурмақта. Тәңритағ хәвәрләр торидин мәлум болушичә, ғулҗа наһийисиниң дадамту йезисида бу йилдин башлап "бир кәнттә бир сақчи ишханиси, бир сақчиханида бир хәлқ сақчиси, бир мәһәллидә бир сақчи - хәлқ алақилишиш нуқтиси болуш" дәйдиған башқуруш түзүми йолға қоюлған.
Мухбиримиз ирадә
2010.04.22

Бу түзүм бойичә болғанда, дадамту йезиси вә йезиға тәвә 5 кәнттә җәми 6 сақчи ишханиси вә бу кәнтләрдики һәр бир кочидин бир аилә таллинип "сақчи - хәлқ алақилишиш нуқтиси" қурулидикән.

Уйғур райониниң вәзийитини көзәткүчиләр болса, дадамту йезисидики "сақчи - хәлқ алақилишиш понкитлири" йәрлик хәлқниң сөз - һәрикитини техиму қаттиқ қамал қилишни мәқсәт қилған ишпийонлуқ орунлиридин ибарәт дәп қаримақта.

Ғулҗа наһийисиниң дадамту йезиси хитай даирилиригә қарита наразилиқ һәрикәтлири пат - пат йүз берип туридиған җай болуп, өткән йили мәзкур йезида уйғурлар терилғу йәрлирини хитай даирилиригә сетип бәрмәслик үчүн сақчилар билән тиркәшкән, ара дадамту аяллири топа иттириш машинисиниң алдиға өзини етип, терилғу йәрлириниң хитай көчмәнлириниң қолиға өтүп кетиштин сақлап қалған иди.

Буниңдин башқа йәнә, дадамту йезисидики арзугүл турсун сақчи даирилири билән тиркишип, хитайниң пиланлиқ туғут оператсийисидин бир қанчә қетим қутулған вә ахири униң балиси дуняға сақ - саламәт көз ачқан иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.