Америка һөкүмити гуантанамодики уйғур мәһбусларниң һәммисини гунаһсиз дәп қарайдиғанлиқини билдүрди

Гуантанамода тутуп туриливатқан 17 нәпәр уйғур мәһбустин 5 нәпири, америка һөкүмити тәрипидин 3 айниң алдида дүшмән җәңчиси әмәс, йәни гунаһсиз дәп елан қилинған иди.
Мухбиримиз шөһрәт һошур
2008-10-01
Share

Түнүгүн, йәни 30 ‏ - сентәбир күни қалған 12 нәпәр уйғур мәһбусниму охшашла гунаһсиз дәп қарайдиғанлиқини билдүрди. Әслидә гуантанамодики уйғур мәһбусларниң сани 22 болуп, булардин 5 нәпири 3 йилниң алдида гунаһсиз дәп қоюветилгән вә албанийигә йәрләштүрүлгән иди.

Бу йил 6 ‏ - айда йәнә америка әрзийәт сотида мәһбус пәрһат һузәйфа гунаһсиз болуп ақлинип чиққан. Сотниң бу қарариға асасән, пәрһат һузәйфа билән бирликтә җалалидин, абдусәмәт, сабур вә халид қатарлиқ җәмий бәш уйғур мәһбусни гунаһсиз дәп қарайдиғанлиқи билдүрүлгән иди. Әмма пәрһат һузәйфаниң адвокати, һөкүмәтниң бу қараридин рази болмиған, у 12 уйғур мәһбусниң һәммисиниңла гунаһсиз дәп қарилиши керәкликини билдүрүп сотқа әрз йоллиған иди.

Буниңға асасән, йәрлик сот һәрбий сотқа 30 күн вақит ичидә гуантанамодики барлиқ уйғурларни гунаһсиз дәп елан қилишини, ундақ болмиғанда, уларниң гунаһкарлиқиға, йәни дүшмән җәңчиси икәнликигә аит пакит көрситишини тәләп қилған иди. Түнүгүн мөһләт тошқан күни, америка һөкүмити һәрбий соти, америка йәрлик сотиға қалған 12 уйғурниму гунаһсиз дәп тонуйдиғанлиқини билдүрди.

Сот хатирлиридин мәлум болушичә, гуантанамодики уйғур мәһбусларниң афғанистанда, хитайға қарши һәрбий тәлим көргәнлики, америкиға қарши һечқандақ дүшмәнлик нийәт вә пиланиниң болмиғанлиқи, уларниң гунаһсиз санилишиға асаслиқ сәвәп болған.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт