Gu'antanamodiki Uyghurlar amérikigha qoyup bérilishi mumkin

Washin'gton pochtisi gézitide körsitishiche, gu'antanamodiki Uyghur tutqunlarning adwokatliri mezkur Uyghurlarning amérikining dölet bixeterlikige héchqandaq tehdit élip kelmeydighanliqi ispatlan'ghan bolsimu, emma tutruqsiz pakitlar bilen uzaq turup ketkenlikini tekitleshken hemde bu Uyghurlarning amérikigha bolupmu amérikida Uyghurlar bir qeder köprek olturaqlashqan washin'gton rayonigha qoyup bérilishi kéreklikini telep qilghan.

Nöwette amérikining gu'entanamo herbiy türmiside 17 neper Uyghur qamalghan bolup, amérika hökümiti bu Uyghurlarning hemmisini düshmen jengchisi emes dep békitken hemde héchqandaq dölet mezkur Uyghurlarni qobul qilmighan shara'ittimu xitaygha qayturup bérishni ret qilghan idi.

7 - Öktebir seyshenbe küni amérika washin'gton kolombiye rayonluq sotta gu'antanamodiki Uyghur tutqunlardin besh nepirini qoyup bérish mesilisi üstide sot échilidighan bolup, melum bolushiche, mezkur Uyghurlarning adwokatliri yene qalghan 12 neper Uyghurnimu qoyup bérilidighanlar qatarida oylishish heqqide rayonluq bash sotchi richard urbina ependige matériyal yollighan.

Amérikining gu'entanamo türmisige esli 22 Uyghur qamalghan bolup, bularning ichidiki besh neper Uyghur 2006 - yili aqlinip albaniyige yerleshtürülgen idi.