گۈەنتانامودىكى ئۇيغۇرلار پالاۋغا بېرىشقا قوشۇلدى

ھازىر گۈەنتانامودا 13 نەپەر ئۇيغۇر تۇتۇپ تۇرۇلۇۋاتقان بولۇپ، ئىلگىرى بۇلارنىڭ ھەممىسىنى تىنچ ئوكياندىكى ئارال دۆلىتى پالاۋغا يەرلەشتۈرۈش پىكرى كۈچەيگەن بولسىمۇ، ئەمما بۇ ئۇيغۇرلار پالاۋغا بېرىشنى خالىمىغان بولغاچقا، بۇ ھەقتىكى غۇلغۇلا سەل پەسىيىپ قالغان ئىدى.

خەۋەردە كۆرسىتىشىچە، گۈەنتانامودىكى ئۇيغۇرلارنىڭ ئادۋوكاتلىرىدىن بىرى بولغان جورج كلارك، ئامېرىكا تاشقى ئىشلار مىنىستىرلىقىدىكى بىر قىسىم ئەمەلدارلارنىڭ دۈشەنبە كۈنى گۈەنتانامودىكى ئۇيغۇرلار بىلەن كۆرۈشكەنلىكىنى، ھەمدە بىر قىسىم ئۇيغۇرلارنىڭ پالاۋغا بېرىشقا قوشۇلغانلىقىنى بىلدۈرگەن.

ئادۋوكات جور كلارك، ھازىر گۈەنتانامودا تۇرۇۋاتقان 13 نەپەر ئۇيغۇرنىڭ ھەممىسى بولمىسىمۇ، 4 تىن كۆپ ئادەمنىڭ پالاۋغا بېرىشقا قوشۇلغانلىقىنى بىلدۈرگەن.

بۇ يىل ئىيۇندا پالاۋ ھۆكۈمىتى گۈەنتانامودىكى ئۇيغۇرلارىنىڭ ھەممىسىنى قوبۇل قىلىدىغانلىقىنى بىلدۈرگەن بولسىمۇ، ئەمما گۈەنتانامودىكى ئۇيغۇرلار مەزكۇر تەكلىپنى رەت قىلغان ئىدى.