En'gliye gu'antanamo tutqunlirini qobul qilishqa teyyar ikenlikini bildürdi

"Taymiz" gézitining yéngi yil küni tarqitilghan sanidiki bir xewerde, en'gliye bash ministirliq mehkimisidiki da'irilerning en'gliye burun prézidént bushning iltimasini ret qilghan bolsimu, lékin hazir tutqunlarni orunlashturushni qollaydu, dégenlikini we bu mesilining resmiy küntertipke élin'ghanliqini, en'gliye ichki ishlar ministirlikining "her bir déloni birmu - bir körüp chiqidighanliqi"ni ilgiri sürgen.

Xewerde yene, bash ministirliq mehkimisidiki da'iriler bu mesilini en'gliye tashqi ishlar ministirliki bilen jiddiy sözlishishke toghra kélidighanliqini, lékin bu mesilide tashqi ishlar ministirliki nahayiti aktip bolup, buning" obama bilen bolghan munasiwettiki yaxshi bir bashlinish bolup qélishini ümid qilidighanliqi"ni, emma tutqunlarning köchmenlik shtati, turalghu jayi we turmush puli qatarliqlarni hel qilish kérek bolupla qalmay, bu mesile yene " kabénitning qarar chiqirishi telep qilinidighan mesile" ikenlikini bildürgen.

En'gliye bash ministirliq mehkimisidiki yuqiriqi emeldar yene en'gliyining portugaliye tashqi ishlar ministiri amadoning güentanamo tutqunlirini yawropa ellirige orunlashturushni oyliship körüsh heqqidiki chaqiriqigha awaz qoshudighanliqini tekitligen.

Portugaliye tashqi ishlar ministiri amado bu mesilini mushu ay ichide chaqirilidighan yawropa ittipaqi tashqi ishlar ministirlirining yighinida otturigha qoyidiken. Bu mesile yene yawropa ittipaqi omumi ishlar we tashqi ishlar komitétining yighin küntertipige kirgüzülgen.

Közetküchiler, gu'antanamo lagérini taqashtiki achquchluq mesile mezkur lagérdiki 17 neper Uyghurni orunlashturush mesilisi ikenlikini ilgiri sürmekte idi.