Amérika, gogulgha hujum qilish weqesige “Nahayiti jiddiy” mu'amile qilidighanliqini bildürdi
2011.06.03
Gogul shirkiti bir qisim xéridarlirining xet alaqe sanduqi hujumigha uchrighanliqini, hujumning xitaydin kelgenlikini élan qilghan idi. Klinton xanim, gogulning aldinqi küni ehwalni amérika dölet ishlar ministirliqigha melum qilghanliqini eskertip, “Bu weqe nahayiti éghir hadise. Biz buninggha nahayiti jiddiy mu'amile qilimiz. Biz buni tekshürimiz” dégen.
Buning aldida aqsaray amérikining “Uchur we alaqe asasi eslihelirige qaritilghan tehdit uning iqtisad we dölet bixeterlikige jiddiy xewp yetküzidighanliqi” ni eskertip, prézidént obamaning buninggha jiddiy qaraydighanliqini ilgiri sürgen idi.
Lékin, xitay tünügün xitayni tor jasusluqi élip bérish bilen eyibleshning qobul qilinmaydighanliqini eskertip, gogulning bu mesilidiki eyiblishini ret qilghan.
Gogul tor békitining ilgiri sürüshiche, xitay xakkérlar gogulgha kirip, amérikining yuqiri derijilik hökümet emeldarliri, herbiy xadimliri, zhurnalistlar we xitay pa'aliyetchilirining gma'il diki xet sanduqigha kirishke urun'ghan.
Gogul shirkiti hujumning xitayning shendung ölkisi jinen shehiridin kelgenlikini ilgiri sürgen. Gerche gogul hujumning xitaydin kelgenlikini élan qilghan we amérika hökümiti buninggha jiddiy qaraydighanliqini bildürgen bolsimu, lékin ular hujumning arqisida xitay hökümiti barliqini ashkara tilgha élip baqmidi.