Xitay klinton xanimning sénkaku arili heqqide qilghan sözige étiraz bildürdi

Klinton xanim ötken jüme küni yaponiye tashqi ishlar ministiri kishida bilen washin'gtonda körüshüp, xitayni yaponiyining sénkaku ariligha bolghan kontrolluq hoquqigha mudaxile qilmasliqqa agahlandurghan. U, yaponiye kontrolluqidiki rayonlarning amérika-yaponiye bixeterlik shertnamisige asasen qoghdilidighanliqini eskertip, biz yaponiyining bashqurushigha buzghunchiliq qilidighan herqandaq bir tereplimilik heriketke qarshi turimiz, dégen idi.

U yene, biz herqandaq birining weziyetni jiddiyleshtürüwétidighan herqandaq bir herikette bolushini yaki rayonning tinchliq, bixeterlik we iqtisadiy tereqqiyatigha buzghunchiliq qilidighan xata mölcherde bolushini xalimaymiz, dep körsetken. Klintonning agahlandurushida béyjingning ismi tilgha élinmighan bolsimu, biraq u, biz xitay bilen yaponiyining bu mesilini di'alog arqiliq tinch hel qilishini arzu qilimiz, dep tekitligen.

Xitay tashqi ishlar ministirliqi bayanatchisi xong léy düshenbe küni klintonning sözini tenqidlep: amérika terepning mezkur bayani pakitqa pisent qilmighanliq, toghra-xatani arilashturuwetkenlik. Junggo buningdin qattiq narazi boldi we buninggha keskin étiraz bildürdi, dégen.

Yaponiye kabinét sékrétari yoshixide suga xong léyning sözini tenqidlep, xitay terepning bayani “Pewqul'adde epsuslinarliq” dep körsetti. U: klintonning sözi amérikining yaponiye-amérika bixeterlik shertnamiside üstige alghan küchlük mes'uliyitini namayan qilidu, dédi.