خىتاي دۆلەتلىك نېفىت شىركىتى قارمىقىدىكى نېفىت قۇرۇلۇش شىركىتىنىڭ بىلدۈرۈشىچە، مەزكۇر تۇرۇبا لىنىيىسىنىڭ دىئامېتىرى بىر مېتىردىن ئاشىدىغان بولۇپ، بۇ ئۇلار ياسىغان ئەڭ چوڭ دىئامېتىرلىق تۇرۇبا لىنىيىسى ئىكەن.
يىللىق گاز توشۇش مىقدارى 30 مىليارد كۇب مېتىرغا يېتىدىغان مەزكۇر تۇرۇبا لىنىيىسى يەنە كۆمۈردىن ئايرىلغان يېقىلغۇ گازىنى خىتاينىڭ دېڭىز بويىدىكى باشقا رايونلىرىغىمۇ يۆتكەيدىكەن.
رادىئومىز ئىگىلىگەن ئۇچۇرلارغا قارىغاندا، غۇلجىنىڭ پەنجىم قاتارلىق رايونلىرىدىكى كۆمۈر كانلىرىنىڭ ھەممىسى خىتاي شىركەتلىرىگە ئۆتۈپ كەتكەن. ئۇلار نۆۋەتتە غۇلجىدا كۆمۈردىن بىرىكمە گاز ئايرىپ چىقىدىغان زاۋۇتلارنى قۇرۇشقا باشلىغان.
ئىلگىرى بەزى مۇتەخەسسىسلەر بۇ خىلدىكى زاۋۇتلارنىڭ غۇلجىنىڭ ئېكولوگىيىلىك مۇھىتى ۋە غۇلجا خەلقىنىڭ سالامەتلىكىگە ئېغىر تەھدىتلەرنى ئېلىپ كېلىدىغانلىقىنى بىلدۈرۈشكەن ئىدى.
