Gherb döletliri islamiy bankilarning qa'ide ‏- tüzümlirini öginishke bashlidi

Köpligen islamiy bankilarning dunya pul mu'amile krizisidin ziyan körmigenliki, nurghunlighan döletlerni islamiy bankilarning qa'ide - tüzümlirini öginishke we ulardin ülge élishqa ündimekte.
Muxbirimiz ömer qatat
2008-12-24
Élxet
Pikir
Share
Print

Amérika birleshme agéntliqining xewer qilishiche, yéqinda fransiye hökümiti bu dölette islamiy tüzüm yeni qur'an kerimde otturigha qoyulghan prinsiplar asasida pa'aliyet élip baridighan bankilarning pa'aliyet qilishigha yol qoyidighanliqini jakarlighan.

Xewerde éytilishiche, fransiye maliye ministiri kiristin ligardi, parizhni bir büyük islam maliye merkizige aylandurush üchün, mewjut qanun we tüzümlerge özgirish kirgüzidighanliqi toghrisida wede bergen. U yéqinda fransiyining paytexti parizhda ötküzülgen bir yighinda qilghan sözide, "dunyada ochuqluq we mes'uliyetchanliqqa tayan'ghan yéngi xelq'araliq pul mu'amile prinsiplirini békitish üchün gherb döletliri pul mu'amile mutexessisliri islam dunyasidin öginidighan bezi nersiler bar," dégen.

Xewerlerge qarighanda, nöwette islamiy qa'ide - tüzüm bilen yeni islamiy qanun - prinsiplar asasida pa'aliyet élip bériwatqan bankilarning jem'iy meblighi 700 milyard dollar etrapida bolup, mezkur bankilarning meblighi her yili 10 pirsent bilen 30 pirsent arisida köpeymekte iken.

Gerche islamiy bankilar gherb pul - mu'amile sistémisining ornini alalaydighan küch we qudretke ige bolmisimu, gherb döletliri pulgha éhtiyaj boluwatqan bügünki künde, nurghun kishiler islamiy bankilarni pul yéghishning yene bir charisi dep qarimaqta.


Toluq bet