Isra'iliyining urush toxtitish xiyali yoq

Béritaniye axbaratining seyshenbe isra'iliye bash ministiri ihod olmartning sözini neqil keltürüp xewer qilishiche, isra'iliyining gaza rayonigha qaratqan bombardimani bashlan'ghinigha töt kün bolghan bolsimu, ihud olmart " bu téxi isra'iliyining gaza rayonidiki pelestin eskerlirige qaratqan uzaq muddetlik hujum pilanimizning birinchi qedimi" dégen.
Muxbirimiz gülchéhre
2008.12.30

Isra'iliye da'iriliri yene gaza rayonidiki urushni dawamlashturush bilen teng, bir nechche hepte ichide xamas teshkilatigha qarshi mexsus hujum qozghimaqchi bolup,isra'iliye mudapi'e ministiri xamasqa qarshi kürishimizni axirghiche dawamlashturimiz dégen.

Isra'iliyining ötken shenbe künidin bashlap dawam qiliwatqan hawa hujumi jeryanida gaza rayonida ölgenler 380 ge yetti, 1800 din artuq bigunah puqralar yarilandi. Birleshken döletler teshkilati ölgenlerning ichide az dégende 62 nepirining balilar we ayallar ikenlikini bildürmekte.

Bügün isra'iliye da'iriliri, xamas teshkilatining rakéta bilen hujum qilishi bilen isra'iliyidimu bir eskerni öz ichige alghan töt ademning ölgenlikini bildürgen. Amérika birleshme agéntliqining xewirige qarighanda, yawropa birlikige eza döletler tashqi diplomatiye emeldarliri gaza krizisi heqqide bügün parizhda jiddiy yighilip, pelestin ‏ - isra'iliye toqunushini hel qilish, urush toxtitish muzakiriliri élip barghan.

Yawrupa birliki bügün yene birleshme bayanat élan qilip, tereplerni urush toxtitishqa chaqirghan hem yardem we qutquzush buyumlirining gaza rayonigha kirishige yol échilishini kütidighanliqini bildürgen.

Xelq'araliq axbaratlarning gaza rayonidin tarqatqan xewerlirige qarighanda, bu rayon intayin jiddiy hem qalaymiqan urush otida qalghan bolup, doxturxana we qizil krist yardem orunlirida doxtur ‏ - séstiralar jan talishiwatqan apettiki xelqni qutquzush üchün axirqi chekkiche tirishmaqta.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.