Дунядики рәһбәрләр исраил һуҗуми үстидин тәкшүрүш елип беришни бирдәк тәләп қилди

Бүгүн б д т бихәтәрлик кеңиши җиддий йиғин өткүзүп вәқә үстидә тез, тәрәпсиз вә ашкара тәкшүрүш елип бериш керәкликини оттуриға қойған. Шималий атлантик әһди тәшкилатиму баянат елан қилип, исраилийиниң тутуп қелинған 6 парахот вә йүзлигән пәләстин қоллиғучилирини қоюп беришни тәләп қилған. Бүгүн йәнә әнглийә, франсийә вә русийә қатарлиқ дөләтләрму баянат елан қилип, исраилийини ғәззәдики ишғалийитини бикар қилишқа чақирған.
 
Исраилийә болса, ярдәм елип маңған парахотларға икки саәт аввал агаһландуруш бәргәнликини, әмма парахотлар агаһландурушқа пәрва қилмай кириши чәкләнгән районға давамлиқ илгирилигәнлики үчүн икки тәрәп арисида дәсләп талаш‏ - тартиш, арқидин тоқунуш чиққанлиқини билдүрмәктә.

Түркийә баш министири рәҗәп тайип әрдоған түнүгүн исраилийә һуҗуминиң җавабсиз қалмайдиғанлиқини билдүргән. Бу нөвәт исраилийигә наразилиқ билдүргән дөләтләр арисида хитайму мәвҗут; әмма, уйғур мусулманлириға рәһимсиз бастуруш сиясити қоллиниватқан хитайниң пәләстин хәлқини тәрәп тутуши уйғур көзәткүчилириниң һәр вақит гуманини қозғап кәлмәктә.

Уйғур көзәткүчилири хитайниң бу қетимқи мәйданини, хәлқара җамаәт пикрини корийидики парахот маҗрасидин оттура шәрқтики парахот вәқәсигә йөткәш вә яки ислам әллириниң һимайисини қолға кәлтүрүш үчүн дәп қаримақта.