Amérikining döletlik istémalchilar bixeterlikini qoghdash komitéti béyjing shehiride ishxana achmaqchi

Düshenbe küni bu heqte toxtalghan komitét re'isi inéz tenenba'um, mezkur ishxanining amérikining mehsulat bixeterliki heqqidiki endishilirini xitay terepke yetküzüshkimu qulayliq yaritip béridighanliqini bildürdi.

Melum bolushiche, bu nöwet xitayning béyjing shehiride échilidighan ishxana amérika istémalchilarning bixeterliki qoghdash komitéti chet'elde achqan tunji ishxana iken.

Tenenba'umning bildürüshiche, amérikida istémal qilinidighan buyumlarning 45 pirsenti we balilar oyunchuqlirining 90 pirsenti xitay we xongkongdin import qilinidiken. Shunglashqa bu xildiki ishxanini béyjingda échish emeliyetke tolimu uyghun iken.

Xewerlerge qarighanda, ishxana amérikining béyjingda turushluq elchixanisi ichige tesis qilin'ghan bolup, ishxanigha deslepte ikki neper xadim orunlashturulidiken.

Bu xadimlar xitayning munasiwetlik organliri bilen alaqe baghlap, xitaydiki zawut- karxanilarni amérikining süpet ölchimi boyiche terbiyilesh xizmiti élip baridiken.

2007-Yili amérikida bir qisim ermek haywanlar xitaydin import qilghan haywanat yémekliridin zeherlinip ölgendin kéyin, weqe dunya xaraktérlik inkas qozghighan. Aridin uzun ötmey amérikida yene xitaydin import qilin'ghan balilar oyunchuqliridin zeherlinish weqesi, xitaydin import qilin'ghan nachar süpetlik balon weqeliri otturigha chiqqan idi.