Zorlap sétilghan kala séghish mashinisi 22 yashliq seydullaning jénigha zamin boldi

Uyghur élining yéza ‏- qishlaqlirida yéza rehberliri bilen bir qisim zawut, karxanilirining gheyriy exlaqiy hemkarliqliri, shu jaylardiki istémalchilarning menpe'etlirini dexlige uchratmaqta we bezide paji'elerni keltürüp chiqarmaqta.
Muxbirimiz shöhret hoshur
2011-01-25
Share

Ghulja shehirining penjim yéza ara mehelliside olturushluq bir béqimchi a'ilining 22 yashliq oghli seydulla ötken hepte, kala séghish mashinisini ishlitiwatqanda tok soquwétip hayatidin ayrilghan.

 Mehellidiki ahalilerning inkas qilishiche, yéza rehberliri mehellidiki béqimchi a'ililerni kala séghishta en'eniwi usulidin waz kéchishke we kala séghish mashinisini ishlitishke mejburlighan؛ uning üstige béqimchilarning kala séghish mashinisini özliri tallap sétiwélishigha yol qoymighan. Ara mehellidiki béqimchilargha zorlap sétilghan bu mashinilarning téxnikiliq qurulmisi mukemmel bolmighachqa, bu qétimqi paji'e kélip chiqqan.

Nöwette seydullaning ata-anisi, süpetsiz kala séghish mashinisini ishlepchiqarghan zawut üstidin shikayet qilmaqchi bolghanda, yéza rehberliri we sheherning alaqidar organliri ulargha türlük telim ‏- terbiyiler bilen tosqunluq qilmaqta. Emma, mehellidiki ahaliler bolsa, yéza rehberlirining mezkur mashinilarni sétiwélish jeryanida ishlepchiqarghan zawutlardin para alghanliqini, shunga u zawutlargha bérip erz qilishqa tili qisqa kéliwatqanliqini bildürmekte. Emma, xitayning yéza igilik qanunida, déhqan -charwichilargha ishlepchiqirish pilani we usulini mejburlashqa bolmaydighanliqi, ishlepchiqirish wasitilirini özliri erkin sétish we sétiwélish hoquqigha ige ikenliki éniq bildürülgen.

Melum bolushiche, hayatidin ayrilghan seydulla musibetlik a'ilining ikki perzentidin biri. Nöwette seydullaning ata-anisi el-jama'etke, oghlining jénigha zamin bolghan zawut hem yéza rehberliri üstidin dawa achidighanliqini, herqandaq bir tehditning ularni bu yoldin waz kechtürelmeydighanliqini bildürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet