Ürümchi shehiri yol yaqisidiki kechlik bazarlarni emeldin qaldurushni qarar qilghan

Uyghur aptonom rayoni yerlik axbarat wasitilirining ashkarilishiche, ürümchi shehiri da'iriliri kéler yildin bashlap yol yaqisidiki kechlik bazarlarni emeldin qaldurushni we buningdin kéyin bashqa rayonlardimu bundaq bazarlarni testiqlimasliqni qarar qilghan.
Muxbirimiz erkin
2010-12-31
Élxet
Pikir
Share
Print

Bu heqtiki xewerlerde da'irilerning 28 ‏- dékabir küni ürümchidiki bazar bashqurush, sheher qiyapitini bashqurush idarisi qatarliq munasiwetlik organlargha yol yaqisidiki kechlik bazarlarni taqash toghrisida uqturush chüshürgenlikini bildürdi.

Lékin xewerde kechlik bazarlarni taqighandin kéyin, kechlik bazarda tirikchilik qilip jan baqidighan ushshaq tijaretchilerning buningdin kéyinki turmushigha qandaq kapaletlik qilinidighanliqi tilgha élinmighan. Hökümetning uqturushida "peqet "kechlik bazar tijaretchilirining dukan échip tijaret qilishi, bazargha kirip tijaret qilishigha ilham bérilidighanliqi" tekitlen'gen.

 Xewerlerdin melum bolushiche, da'irilerning kechlik bazarlarni taqash qararigha asasen tengritagh we saybagh rayonidiki "ittipaq milliy örp-adetler kechlik baziri", " 1‏- may kechlik baziri"qatarliq Uyghurlar tirikchilik qilidighan yol yaqisidiki kechlik bazarlarning hemmisi taqilidiken. Da'irilerning bu heqtiki uqturushida kechlik bazarlarning taqilish sewebini chüshendürüp, "qatnashning rawan emesliki, sheher qiyapiti, yémek- ichmek we taziliq bixeterlikige tesir körsitidighan amillarni tügitish" ikenlikini ilgiri sürgen.

Kechlik bazarlarni taqash qarari ürümchi shehirining bu yilning bashlirida belgilime chiqirip, Uyghur köchme nopusining ürümchide olturaqlishishini qiyinlashturghanliqi bilen munasiwetlik yaki munasiwetsiz ikenliki ayding emes. Lékin ürümchi weziyitidin xewerdar zatlarning ilgiri sürüshiche, da'iriler kechlik bazarni taqash qarari Uyghur köchmen nopusining kontrol qilish tedbirining bir qismi bolup, sirttin kelgen Uyghurlarning turmush yolini tosush arqiliq ularning ürümchide olturaqlishishini kontrol qilishtur.

Toluq bet