Nyuyorktiki kishilik hoquq közitish teshkilati xitayni xelq'ara musapirlar mesiliside eyiblidi

Doklatta xitay hökümitining ötken yili bérmida yüz bergen hökümet armiyisi bilen öktichi küchler otturisidiki ichki urushta, xitaydin panahliq tilep, yünnen ölkisige kirgen 10 mingdin artuq bérmiliq musapirning ichide, öktichi terepke tewe bolghan nechche yüz neper bérmiliqni bérma hökümitige qayturup bergenlikini hem xitayning xelq'ara musapirlirigha ajratqan pulining tolimu az ikenlikini tekitligen.

Birleshken döletler teshkilatining tor békitidiki uchurlardin melum bolushiche, nöwette xitay ichide panahliq tiligen xelq'ara musapirlar 300 minggha yétidighan bolup, ularning zor köp qismi shimaliy koriye, bérma qatarliq xitaygha chégridash döletler puqraliri iken. Halbuki, her xil sewebler tüpeylidin xitaydin chet'ellerge musapir bolup chiqqanlarning sani 200 minggha yétidiken. Doklatta xitayning xelq'ara musapirlar üchün ajratqan yardem pulining yiligha 250 ming dollar ikenliki otturigha qoyulup, “Xitay özining xelq'ara musapirlar mesilisidiki iqtisadiy burchini ada qilmidi” dep tenqidlen'gen. Melum bolushiche, xitayning qoshnisi bolghan yaponiye qatarliq döletlerning xelq'ara musapirlargha ajratqan yardem puli yiligha 100 milyon amérika dolliri etrapida iken.