Һиларий клинтон камбоджани хитайға беқинип қалмаслиққа чақирди

Америка ташқи ишлар министири һиларий клинтон камбоджани хитайға һәдддин зиядә беқинивалмаслиқ һәққидә агаһландурди. У бу сөзни камбоджаниң пайтәхтидә елип бериватқан зиярити җәрянида қилған.
Мухбиримиз ирадә
2010.11.01

Франсийә агентлиқиниң хәвәр қилишичә, клинтон хитайниң шәрқий җәнуби асия дөләтлиридә тәсириниң барғансери ешип бериватқанлиқиға даир соалларға җаваб бәргәндә" һәрқандақ бир дөләт тәңпуңлуқни сақлиши, бир дөләткә һәддидин зиядә беқинип қалмаслиқи керәк" дегән.

Камбоджа һөкүмити хитайниң йеқин шериклиридин  бири болуп, камбоджада 400 дин артуқ хитай ширкити бар икән.  Бу ширкәтләр камбоджада електр вә көмүр енергийиси қатарлиқ саһәләргиму зор миқдарда мәбләғ салған болуп, клинтон камбоджаниң хитай билән яхши мунасивәт орнитиш арзусиниң орунлуқ  болсиму, әмма хитайға беқиниш әмәс, униң билән тәң йүксилиши керәкликини көрсәткән.

2009 - Йили декабирда камбоджа һөкүмити бирләшкән дөләтләр тәшкилатидин панаһлиқ тиләп камбоджада туруватқан 20 нәпәр уйғурни хитайға қайтурувәткән иди. Әйни чағда хитайниң буниңға җавабән камбоджаға бир милярд 200 милйон доллар иқтисадий ярдәм бәргәнлики мәлум болған. Әмма, хитай бу ярдәмниң 20 уйғурниң қайтурулиши билән мунасивәтлик икәнликини рәт қилған иди.

Мунасивәтлик хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.