Bu yil Uyghur élige kélidighan aqqun ishchilar sanining bir yérim milyon'gha yétidighanliqi texmin qilinmaqta

Herqaysi xitay ölkiliridin kéliwatqan aqqun ishchi sani hawaning issishi bilen biraqla örligen bolup, hazir ürümchi poyiz istansisigha kéliwatqan aqqun ishchi sani künige ottura hésab bilen 7000 etrapida iken.

Bu ishchilarning asasliq menzili hazir türlük qurulush pilanliri yolgha qoyuluwatqan ürümchi, pichan, kuytun, korla we qeshqer qatarliq chong wilayet we sheherler bolup, nöwette da'iriler bu ishchilarni menzilige waqtida bixeter toshush üchün tedbir élishqa bashlighan.

Shinxu'a tori bu heqtiki xewiride, “Uyghur rayonida bu yil zor qurulush türliri ish bashlap, adem we téxnika küchige bolghan éhtiyaj artqanliqtin, ichkiridin kélidighan ishchilar sani körünerlik artti” dégen. Uyghur éli bügün'giche xitay ölkiliridin kéliwatqan milyonlarche xitay aqqun ishchini ish bilen teminlep kéliwatqan bolsimu, emma Uyghur yashliri öz yurtida ish pursitige érishelmey, xitay da'iriliri teripidin türlük namlar astida xitay ölkilirige qayta terbiyilinishke, ezan emgek küchi qatarida ishleshke ewetilmekte.