Уйғур елидики шенхуа көмүр кан ширкитиниң сабиқ баш мудири парихорлуқ билән әйибләнди

Уйғур елидики шенхуа көмүр кан чәклик ширкитиниң сабиқ баш мудири лю бокун чириклик, парихорлуқ җинайити билән әйибләнди.
Мухбиримиз ирадә
2012.11.01

Түнүгүн бейҗиңдики оттура хәлқ соти тәрипидин көрүлгән давада униң уйғур елидики көмүр кан ширкитидә рәһбәрлик вәзиписи өтәватқан мәзгилдә ширкәт малийисидин 30 милйон сом хиянәт қилип, шәхси қору-җай алғанлиқи вә шундақла бир қисим тиҗарәт түрлиригә мәбләғ салғанлиқи, һоқуқидин пайдилинип башқилардин зор миқдарда пара алғанлиқи билдүрүлгән.

Хитайда чиқидиған хәлқ күндилик гезитиниң хәвиридин қариғанда, бу йил 57 яшқа киргән лю бокун хебийлиқ болуп, у 2005-йилидин 2008-йилиғичә болған арилиқта уйғур елидики әң чоң көмүр кан ширкити болған шенхуа ширкитиниң баш мудири болуп турған. У 2011-йили 23 ‏-мартта бейҗиң җамаәт хәвпсизлик тармақлири тәрипидин қолға елинған болуп, униң даваси үстидә тәкшүрүш давам қиливатқан икән.

Хитай һөкүмити 18-қурултай һарписида, өзлириниң аталмиш “паклиқ қурулуши” ға көңүл бөлүватқанлиқини намаян қилиш үчүн хиянәтчилик, парихорлуқ билән шуғулланған бир түркүм кишиләрни тәкшүрүп бир тәрәп қилди. Әмма чәтәлдики уйғур көзәткүчиләр, уйғур елидә хизмәт қиливатқан һәрқандақ бир хитай әмәлдар үчүн хиянәтчилик қилишниң адәттики бир әһвал икәнликини, юқириқидәк җазаланғанларниң пәқәтла чоң хиянәтчиләрни қоғдаш йолида қурбан қилинғанлар икәнликини билдүрүшмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.