Җәнубий корийә дөләт мудапиә министири шималий корийиниң һуҗуми сәвәбидин истипа бәрди

Җәнубий корийә дөләт мудапиә министири ким теюң шималий корийиниң буниңдин икки күн бурун җәнубий корийә һәрбий базисини топқа тутуп, 4 кишиниң өлүшини кәлтүрүп чиқарған қораллиқ иғвагәрчиликигә инкас қайтурушта бошаңлиқ қилиш билән тәнқидкә учрап вәзиписидин истипа бәрди.
Мухбиримиз әркин
2010.11.25

Ким теюң истипа бериштин сәл бурун президент ле миңбак, юнйоң арилидики шимали корийә билән болған чегра линийисидә қошун көпәйтидиғанлиқини елан қилған. Лекин бу һөкүмәткә қаритилған тәнқидни пәсәйтәлмигән иди.
Ким теюң шималий корийә топчи қисимлириниң юнюң арилидики җәнубий корийә һәр бий базисини топқа тутуш вәқәсидин кейин, җәнубий корийә парламент әзалири вә һәтта президент ле миңбакниң һакимийәт бешидики партийисиниң шиддәтлик тәнқидигә учриған. Парламент әзалири ким теюң истипа бериштин бир қанчә саәт бурун ле миңбак һөкүмитини тәнқидләп, һөкүмәтниң бу вәқәгә тәйярлиқсиз қалғанлиқини вә җәнубий корийә армийисиниң һуҗумға кечикип инкас қайтурғанлиқини илгири сүргән. Хәвәрләрдин мәлум болушичә, президент ле миңбак ким теюңниң истипасини қобул қилған болуп, йеңи дөләт мудапиә министири бүгүн тәйинлинидикән.

Шималий корийиниң җәнубий корийини топқа тутуш вәқәси дуня җамаәтчликиниң диққитини қозғап, нурғун дөләтләр шимални әйиблигән вә хитайдин өз тәсирини қоллинип юңяңға нәсиһәт қилишни тәләп қилған иди. Лекин, шималий корийә иғвагәрчиликни алди билән җәнубий корийә қозғиғанлиқини илгири сүрүп, әгәр җәнубий корийә йәнә иғвагәрчилик қилса униңға һуҗум қилидиғанлиқини агаһландурған. Җәнубий корийә президенти ле миңбак пәйшәнбә күни кабент әзалириниң пәвқуладдә йиғини чақирип, шималий корийиниң йәнә "һуҗум қилиш еһтимали барлиқи вә бу қетим әскәрләрниң өлүшигә қарап турмаслиқни" тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.