Mélamin weqesi xitayning baqmichiliq igilikige kéngeydi

Xitay metbu'atliri peyshenbe küni baqmichiliq igiliki bilen shughullinidighan xitay férma - shirketlirining toxu, béliqlar we öy haywanlirini mélamin maddisi qoshulghan dan we yémeklik bilen baqqanliqini ashkarilidi. Xitay chong quruqluqidiki bir qisim metbu'atlar peyshenbe küni küni xewer élan qilip, mélamin weqesining baqmichiliq igilikige kéngiyiwatqanliqini ilgiri sürgen.

" Shangxey géziti" jüme küni élan qilghan bu heqtiki bir xewiride shangxey shehridiki munasiwetlik organlarning toxu we béliqchiliq shirketlirini tekshürüsh toghrisida uqturush chiqarghanliqi, mélamin maddisi arilashqan mehsulatlar bayqalghan haman karxanilirini tekshürüshni telep qilghanliqini tekitligen.

 Xitayda mélamin weqesi bayqalghan 9 ‏ - aydin béri bu weqe dunyaning jiddi diqqi'itini qozghighan zor salametlik weqesi bolup qalghan idi. Mélamin deslepte xitayning shijyaju'ang shehiridiki " üch bugha" balilar süt parashukida bayqalghan.

Bu xitay boyiche 60 minggha yéqin bowaqning böriki zeximlinish, 4 balining ölüshini keltürüp chiqarghan idi. Dunya sehiye teshkilati xitay yémeklikler bixeterlikide mesile chiqishqa xitayning yémekliklerni nazaret qilish séstimisidiki boshluqning seweb bolghanliqini agahlandurup, séstimini islahat qilishni telep qilghan idi.

Yéqinda xongkong da'iriliri xitay chong quruqluqida ishlepchiqirilghan tuxumda mélamin bayqalghanliqini élan qilghan. Xitayning nenfang géziti, "haywanlargha béridighan yem xeshekke mélamin maddisi arilashturush baqmichiliq igilikidiki ashkare mexpiyetlik" ikenlikini bildürgen.