' Üch bugha ' ning bash mudiri mélamin weqeside gunahkarliqini qobul qildi

Shinxu'a agéntliqining xewer qilishiche, tyen wénxu'a "üch bugha" mehsulatlirida mesile barliqini 2008 ‏ - yili mayda tekshürüshke bashlighanliqini, lékin bu ishni 8 ‏ - aygha qeder da'irilerge melum qilmighanliqini iqrar qilghan. Xewerde, saxta we ölchemge toshmaydighan süpetsiz mehsulat ishlepchiqirish we bazargha sélish bilen eyiblen'gen tyen wénxu'aning öz gunahini üstige alghanliqi bildürülgen.

Tyen wénxu'a bilen teng yene, shirketning 3 neper yuqiriqi derijilik mes'uli sotlan'ghan bolup, " üch bugha"ning mu'awin bash mudiri wang yüylyangni öz ichige alghan bu kishiler oxshash jinayet bilen eyiblen'gen.

"Junggo" géziti bu heqtiki xewiride, eger tyen wénxu'a qatarliqlarning jinayiti muqimlashsa ölüm jazasigha höküm qilinidighanliqini bildürdi. Buning aldida xitay sehiye ministirliki mélamin weqeside ziyan'gha uchrighuchilargha bir milyard yüz milyon yüen tölem töleshni buyrighan idi. Lékin bezi a'ililer tölem pulini az körüp, tölemni köpeytish toghrisida erz bergen.

Tyen wénxu'a qatarliqlar sot mehkimisige chaqirilishtin burun shijyaju'angdiki sot mélamin weqesi bilen munasiwetlik 17 kishini sotlighan idi. Shijyaju'angda sot échiliwatqan bir mezgilde döletlik süpet we ölchem tekshürüsh idarisi seyshenbe küni xitayning memliket ichi we top tarqitish bazirida sétilidighan plastik qoshuq, pichaq, choka we arilargha mélamin qoshulghanliqini, eger bu qizisa zeherlik bolidighanliqini élan qilghan.