Қирғизистанда өзбек-қирғиз миллий тоқунушиға мунасивәтлик 17 адәмгә муддәтсиз қамақ җазаси берилди

Қирғизистанниң җәнубидики ош вә җалал-абад обалстлирида йүз бәргән өзбекләр билән қирғизлар арисидики тоқунушта 400 дин артуқ адәмниң өлгән
Мухбиримиз үмидвар хәвири
2010-11-24
Share

Бу йил 6-айда қирғизистанниң җәнубидики ош вә җалал- абад  обалстлирида йүз бәргән өзбекләр билән қирғизлар арисидики тоқунушта рәсмий мәлуматларда 400 дин артуқ адәмниң өлгәнлики ейтилған болсиму, бирақ өлгәнләрниң саниниң  әмәлийәттә буниңдин көп икәнлики билдүрүлгән иди. Қирғизистан сот даирилири тоқунуш кәлтүрүп чиқириш вә адәм өлтүрүш билән бир қисим кишиләрни сотлиған болуп, 23-ноябир күни җалал абад областиниң сузақ наһийисидики сот мәһкимиси сот ечип, 17 кишини 12-13-июн күнлири 16 адәмни өлтүрүш җинайити билән әйибләп, уларни муддқәтсиз қамақ җазасиға, икки адәмни 25 йиллиқ қамақ җазасиға һөкүм қилған.

Америка авазиниң хәвәр қилишичә, бу кишиләр 12-13-июн күнлири сузақ наһийисиниң аһалиси ош-бишкәк таш йолини қамал қилип, машиниларни тосқанда адәм өлтүргән.

 Пәрғанә учур ториниң хәвәр қилишичә, мәзкур йол тосқанлар машинилардики адәмләргә оқ чиқарған вә 9 машинини көйдүрүвәткән. Хәвәрдә ейтилишичә, җалал абадниң сузақ наһийисидики мутләқ көп санлиқ аһалә өзбекләр болуп, йол тосқанларниң һәммиси өзбекләр икән. Улар өзлирини қоғдаш үчүн бу ишни қилған. Америка авазиниң хәвиридә сотланғанларниң милләт тәркиби ениқ әмәс дәйилгән. Бирақ пәрғанә учур ториниң йезишичә, 16 нәпәр өлгүчиниң һәммиси қирғиз, өлтүрүш билән әйиблинип, муддәтсиз қамақ җазасиға һөкүм қилинғанларниң һәммиси өзбекләрдур. Йәрлик пуқралар бу делода нурғун ениқсизлиқ барлиқини ейтишқан.

Оштики тоқунушта асаслиқ өзбекләрниң өлгәнлики вә өзбекләрниң өй-маканлириниң көйдүрүлүп, 100 миң әтрапида өзбекниң қошна өзбекистанға қечип берип панаһланғанлиқи хәвәр қилинған иди.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт